Ni Alma L. Tingcang
PAGADIAN CITY , Jan 5 (PIA) – Gi-aprubahan ni Presidente Benigno Aquino III ang proposal sa Palasyo kabahin sa Freedom of Information (FOI) Bill nga pending sa Kongreso, nga nanawagan alang sa mandatory disclosure o pagbutyag sa mga impormasyon sa kagamhanan aron maseguro ang malamboong pagkadayag o transparency sa mga transaksiyon.
Nakigtagbo ang presidente kagahapon nilang Kalihim Florencio Abad, Rene Almendras, Ricky Carandang, Edwin Lacierda ug Undersecretary Manuel L. Quezon III aron paghisgot sa mga detalye sa Freedom of Information Bill.
Si Quezon, nga mao ang nangamahan sa FOI Bill diha sa executive branch miingon sa usa ka press conference sa Malacanang kagahapon nga ilang gituki kauban sa mga stakeholders sulod sa pipila ka bulan ang maong balaodnon ubos sa mando sa presidente.
Siya miingon nga gipresentar niya ang resulta sa mga konsultasyon ug mga pagtuon ngadto sa presidente atol sa gipahigayong meeting kagahapong adlawa.
“Ug ang mando sa presidente kanamo mao kini: “ipadayon ug isulong ang Freedom of information,” pahayag pa ni Quezon.
Hinuon, si Quezon miingon nga mihangyo ang presidente nga tangtangon ang proposed Information Commission gikan sa draft tungod kay nabati sa hepe ehekutibo nga magdugang lamang kini ug laing burokrasya.
“Ang intensiyon niini mao nga gawas sa himoon kini ubos sa demokratikong paagi ug konsultasyon, himoon ang impormasyon nga usa ka katungod sa publiko ug usa ka buhing realidad,” si Quezon miingon.
Matod pa, ang pagpasa sa maong balaodnon depende na sa liderato sa Senado ug Kongreso. Ang mga inputs sa kasamtangang version, ang Tanada bill, iapil pinaagi sa amendments sa proposal nga pending karon sa Kongreso.
Samtang dili tanang impormasyon ang pwedeng ipagawas ngadto sa publiko, ang general rule mao: nga kinahanglan available ang impormasyon alang sa katawhan basta dili lamang kini makonsiderar nga restricted information.
Naglakip kini sa mga impormasyon nga magdaot sa abilidad sa nasod nga protektahan ang kalinaw ug kahusay, diplomatic relations tali sa ubang nasod ug kadtong mag-expose sa mga police ug military operations.
Ang presidente mipahayag sa iyang suporta alang sa FOI Bill sa dihang mikandidato siya pagka presidente sa May 2010 election. (ALT-PIA9/Zambo Sur)
