Ni Alma L. Tingcang
PAGADIAN CITY, January 23 - - Ang kooperasyon tali sa mga ahensiya sa gobyerno ug mga local nga kagamhanan nagpadayon paghatag ug serbisyo ug kaayohan alang sa mga kabos, ang palasyo miingon niadtong nakalabay nga Sabado.
Sa usa ka pamahayag, si Deputy presidential spokesman Abigail Valte miingon nga nakadawat sila ug usa ka taho gikan sa local nga kagamhanan sa Tagum nga nakadawat kini ug P19.65 milyon kantidad sa illegal nga troso nga nasakmit sa Department of Environment and Natural Resources (DENR) didto sa rehiyon sa Davao ning nakalabay nga tuig.
Pinaagi sa usa ka Memorandum of Agreement tali sa kagamhanan sa Tagum City, DENR ug sa Department of Education (DepEd), ang maong mga troso gihimo ug eskwelahan ug mga gamit alang sa ospital, lakip na ang double-deck nga higdaanan alang sa mga sundalo ug mga tigpatuman sa balaod.
“Ang report nag-ingon nga 12,000 ka mga lingkoranan, desks, ug hospital beds ang giapud-apod ngadto sa atong mga kaigsoonan nga biktima sa kalamidad sa Davao del Norte ug Compostela Valley,” si Valte nagkanayon sa maong pamahayag.
Sa samang panahon, mitaho usab si Valte nga ang Department of Tourism ug Department of Public Works and Highways milusad sa ilang Convergence on Tourism Infrastructure Program nga naglaom ug pagkuha sa suporta alang sa tourism-related nga negosyo sa mga local nga komunidad.
Lakip niini ang kasabotan nga magtukod ug dalan aron maabot ang mga tourist sites sa tibuok Pilipinas.
Si Valte miingon nga kalabot kini sa pagpangandam sa pagdagsang sa 10 milyon ka mga langyaw’ng turista nga gilaomang modangat sa 2016, ingon man aron mapaneguro ang pagkatag sa inclusive growth ngadto sa marginalized sector. (ALT-PIA9/Zambo Sur)
