Ni Alma L. Tingcang
PAGADIAN CITY, January 23 - - Ang Deparment of National Defense (DND) nag-andam ug 12,000 ektarya sa mga military reservations sa tibuok nasod alang sa pag-establisar ug nursery sites sa mga kahoy.
Gibutyag kini ni Defense Secretary Voltaire Gazmin tapos ang mga pakigsabot sa ubang mga hingtungdang ahensiya sa kagamhanan kalabot sa nagpadayong National Greening Program (NGP).
Pinaagi sa Executive Order No. 26, gipetsahan ug Pebrero 24, 2011, gideklarar ni Presidente Benigno Aquino III ang implementasyon sa NGP aron pagtigom ug paghiusa sa tanang paningkamot kabahin sa pagpananom sa gobyerno, lokal nga ahensiya sa kagamhanan ug ubang stakeholders lakip niini ang pribadong sektor.
Ang NGP nagtumong aron pagtanom sa 1.5 bilyon nga kahoy diha sa 1.5 milyon ektarya sa yuta sulod sa unom ka tuig gikan sa 2011-2016.
“Ang DND nagpabiling malig-on diha sa iyang saad aron pagtabang pagpreserbar sa kalikopan. Mao kini ang mahimong kabilin ngadto sa mosunod nga henerasyon sa mga Pilipino,” si Gazmin nagkanayon.
Ubos sa maong programa, ang DND maoy gitahasan aron pag-establisar ug mga nurseries ug produksiyon sa mga seedlings, pag-andam sa mga luna, transportasyon ug seguridad.
Si Defense Secretary for Finance, Munitions, and Installations Materiel Fernando gihatagan usab sa responsibilidad alang sa overall management ug supervision sa implementasyon niining NGP alang sa DND-Armed Forces of the Philippines.
Ang Office of the Deputy Chief of Staff for Civil Military Operations, maoy gi-appoint isip lead office.
‘Ang National Greening Program subay sa mga paningkamot aron pagkunhod sa mga kalamidad ug epekto sa climate change. Kinahanglan ato gayud hingusgan ang kampanya tungod sa mga nahitabo nga kalamidad,” pahayag ni Gazmin.
Pinaagi sa pag-implementar ning programa, ang DND ug AFP giawhag nga magtanom ug pinakamenos 10 ka seedlings matag tuig diha sa mga giatkdang luna sulod sa military reservations. (ALT-PIA9/Zambo Sur) 