Ni Alma L. Tingcang
PAGADIAN CITY, January 12 - - Si Presidential Spokesperson Edwin Lacierda mihupay sa mga kabalaka nga ang kakulangon sa supply sa lana tungod sa kasamok sa pagpadala ug lana gikan sa Iran, moresulta unya sa pag-rasyon niini, ug miingon nga usa lamang kini sa contingency plan sa gobyerno.
Sa usa ka press briefing didto sa Malacanang kagahapong adlawa, si Lacierda miingon nga ang Department of Energy nagpadayon pagpangita ug solusyon sa posibleng problema sama sa pagkunhod sa konsumo sa lana alang sa atong nasod.
“Nakig-sultihanay na ako kang Energy Secretary Jose Rene Almendras kabahin niana. Klarohon kini nako pag-ayo, usa lamang kini ka kalagmitan nga plano. Wala kita magtuo nga mograbe pa ang sitwasyon didto sa Strait of Hormuz,” si Lacierda nagkanayon.
Ang Strait of Hormuz mao lamang ang bugtong agianan alang sa mga barko nga nagdala ug mga produktong petrolyo gikan sa nag-unang mga oil-exporting countries didto sa Arabian peninsula. Dili pa lamang dugay, mipataas ang Iran ug tensiyon tali sa Estados Unidos kalabot sa access sa maong agianan sa tubig nga naghulga sa husay ug malinawong pagdeliver sa lana gikan didto ug padulong sa maong dapit.
Si Lacierda miingon nga giduso na sa gobyerno ang programa aron mapalambo ang alternatibong kapanguhaan ug enerhiya ingon man i-revitalize ang Pantawid Pasada Program, usa ka paagi sa fuel subsidy alang sa mga public utility drivers ug operators.
“Ang atong himoon karon mao kini, nga tungod sa pagtaas sa presyo sa lana, atong i-aktibo na usab ang Pantawid Pasada tungod kay aduna pa kitay pondo nga P200 milyon,” si Lacierda namulong.
“Klarohon nako kini, dili kita magsugod pag-rasyon sa lana,” panapos nga pulong ni Lacierda. (ALT-PIA9/Zambo Sur)
