Ni Alma L. Tingcang
PAGADIAN CITY, January 12 - - Gipangulohan ni Presidente Benigno Aquino III ang inagurasyon sa dugang pasilidad sa outsourcing provider nga ExlService Holdings Inc. nga nakabase sa New York, didto sa SM Mall of Asia sa Pasay City kagahapon.
Sa iyang pakigpulong, gipasalamatan sa presidente ang pamunoan sa ExlService tungod sa pagpalapnag sa ilang operasyon dinhi sa nasod ug ang mas dakong operasyon maayong sukaranan pagsulod sa bag-ong tuig.
Ang pagpalapad sa ExlService nagpakita lamang sa nabag-ong kumpiyansa sa mga mamuhunan alang sa Pilipinas ubos sa bag-ong pangagamhanan.
“Sukad sa akong pagpamuno, daghan ang nagpakita sa ilang kumpiyansa sa atong nasod. Apan sa ako nang gikaingon, walay mas lig-on pa nga pagpadayag sa kumpiyansa kaysa mismong pagnegosyo dinhi sa nasod,” matod pa sa presidente.
“Among ipasalig nga samtang kamo nag-negosyo dinhi, magpadayon ang among paningkamot aron mahimong mas sayon kini alang kaninyo,” pahayag niya.
Kumpiyansa ang presidente nga ang ExlService, sama sa ubang business process outsourcing (BPO) nga kompanya, makapatrabaho ug igong kwalipikadong trabahante busa gilusad sa gobyerno ang Training-for-Work scholarship program ubos sa Technical Education and Skills Development Authority (TESDA).
Ang maong programa naghatag ug libreng training sa mga potensiyal nga BPO workers sa contact center, software development animation ug medical transcription sectors.
Hangtod niadtong Enero 4, 2012, ang kagamhanan naka-release na ug sobra P140 milyon sa P500 milyon nga alokasyon alang sa sector sa BPO ubos sa disbursement acceleration program, nga tugbang alang sa 23,000 nga scholarship grant.
Padayon usab nga nakigtambayayong ang gobyerno tali sa Business Process outsourcing Association of the Philippines (BPAP) alang sa training ug job generation program, matod sa presidente.
Ang Department of Science and Technology naglihok usab aron molambo ang English proficiency sa mga estudyante sa kolehiyo aron maandam sila alang sa trabaho sa BPO ug sa mga call centers, dugang pa niya.
Aron pagmugna ug trabaho gawas sa Metro Manila, ang presidente miingon nga giduso sa kagamhanan ang gitawag ug “next wave cities” aron mapalapdan ang lokasyon sa mga call center ug BPOs sa nasod lakip niini ang Cebu, Davao, ug Cagayan de Oro City. (ALT-PIA9/Zambo Sur)
