ni Franklin P. Gumapon
DIPOLOG CITY, Dec. 21 (PIA) - - Usa ka hugpong sa mga Muslim professional dakung uyon sa pagkatudlo sa kanhi representante sa “Anak Mindanao party-list nga si Mujiv Hataman isip acting regional governor sa Autonomous Region in Muslim Mindanao (ARMM) nga nahimutang sa dakbayan sa Cotabato karong bag-o.
Ang katungdanan ni Hataman molibkas kon makapili na unya ug mga bag-ong opisyales sa ARMM karong 2013.
Matud pa ni Amina Rasul, convenor sa Philippine Council for Islam and Democracy (PCID) nga hugtanon nilang gipaluyohan ang pagkatudlo ni Hataman isip acting governor sa ARMM tungod kay kusganon kining nakigbisog alang sa kaayuhan sa mga Muslim.
Ang PCID nagatoo nga si Hataman makakuha usab ug suporta gikan sa mga dili Muslim sulod ug gawas sa ARMM.
Dugang sa PCID nga ang pagkatudlo ni Hataman nagdala ug maayong timailhan alang sa kausaban sa maong rehiyon 20 ka bulan sa dili pa ang piniliay.
Si Hataman usa ka personal choice ni Presidente Benigno Simeon C. Aquino III ug busa daku ang pagsalig sa Presidente kaniya.
Ang bag-ong Pangulo sa ARMM kanhi membro sa house committee on human rights kinsa kauban usab ni kanhi kongresista ug karon Presidente Benigno Simeon C. Aquino. Kining maong komitiba mao ang mipahigayon ug imbestigasyon sa kidnapping nga nanghitabo sa ARMM lakip na ang pagpatay sa mga Moro activist ug kadtong gituho-an nga mga sakop sa Abu Sayyaf.
Si Bainon Karon, kinsa usa ka opisyal sa Moro National Liberation Front (MNLF) ug nahimong sekretaryo sa social welfare sa ARMM, maoy natudlo isip vice governor ni Hataman.
Daku ang pagsalig sa PCID nga si Karon makahimo sa pag-atiman sa mga panginahanglanon sa mga katawhan sa ARMM aron makab-ot ang Millennium Development Goals (MDG). (fpg/pia-Zamboanga del Norte)
