ni Alfonso T. Ruda
DIPOLOG CITY, DEC. 21(PIA)--- Malipayong gidawat sa mga negosyador sa gobyerno ang gideklarar sa mga Rebelding Komunista nga 6-ka adlawng staggered ceasefire panahon sa Pasko.
Sayo niini, nagdeklarar ang gobyerno ug 18-ka adlaw nga suspension of military operations (SOMO) batok sa mga rebelding komunista panahon sa Pasko nga nagsugod niadtong Disyembre 16, 2011 ug molungtad hangtud sa Enero 2, 2012.
Sumala pa sa Communist Party of the Philippines, ang ceasefire magsugod sa tungang-gabii sa Disyembre 24, 2011 hangtud sa alas 11:59 sa Disyembre 26, 2011 ug gikan sa tungang-gabii sa Disyembre 31, 2011 hangtud sa alas 11:59 sa Enero 2, 2012.
“Nalipay kami nga nakita sa Communist Party of the Philippines-New People’s Army-National Democratic Front (CPP-NPA-NDF) sa ilang kasing-kasing ang pagdeklarar ug ceasefire panahon sa Pasko ug Bag-ong Tuig aron hatagan ug panahon ang ilang manggugubat nga kalimtan una ang pagpakig-gubat,” matod pa ni Foreign Affairs Undersecretary Alexander Padilla, ang Hepe sa mga negosyador sa gobyerno.
Bisan pa man niini, wala gitago sa panel ang ilang pagkadismaya sa gihimong pag-atake sa mga rebelding komunista sa mga sundalo didto sa Tandag City, Surigao del Sur niadtong Disyembre 16, 2011, ang adlaw nga nagdeklarar ang gobyerno ug ceasefire uban sa mga rebelding komunista.
“Naglagot kami tungod kay ingon sa gihagit sa mga rebelding komunista ang ceasefire nga gideklarar sa gobyerno pinaagi sa paglusad ug pangatake sa mga sundalo nga nagpahigayon ug “peace work” ilalom sa Oplan Bayanihan.”
“
Hinuon, ang deklarasyon alang sa hamubong ceasefire ug pagpakigtinabangay sa pagtunol ug hinabang sa mga biktima sa bagyong si Sendong, maoy usa ka maayong kalambuan,” matod pa ni Padilla.
Karon mao ang tukmang panahon alang sa panaghiusa sa mga Filipino ug ang tanyag sa CPP-NPA-NDF nga motabang sa mga biktima sa baha nga dala sa bagyong si Sendong maoy pinaka-anindot nga kalambuan,” dugang pa ni Padilla.
Sayo niini, nanawagan ang non-governmental peace advocate nga Waging Peace Philippines sa CPP-NPA-NDF nga tugbangan usab ang 18-ka adlawng ceasefire nga gideklarar ni Presidente Benigno Aquino III panahon sa Pasko. (ATR/PIA9-Zambo Norte)
