ni Claro A. Lanipa
MANILA, Nov. 14 (PIA) -– Gipahibalo ni Presidente Benigno S. Aquino III nga usa ka kompaniya sa Estados Unidos magsugod sa pagpalambo sa natural gas sa amihanang dapit dinhi sa Pilipinas sugod sa sunod tuig.
Gihimo sa Presidente ang pahibalo atol sa gipahigayong pagdukiduki mahitungod sa seguridad sa ekonomikanhong pag-uswag sa Asia Pacific Economic Cooperation (APEC) CEO Summit sa Sheraton Waikiki Hotel sa Honolulu Hawaii.
Ang Presidente miadto sa Hawaii alang sa tulo ka adlaw pagbisita ug sa pag-apil sa APEC Economic Leaders’ Meeting kauban sa laing 20 ka mga lideres. Ang maong tigum gilaoman motuki sa mga isyus, sama sa pag-uswag sa ekonomiya ug sa pagmugna mga trabaho, mga reporma ug pag-indigay, kasarang ug seguridad sa enerhiya.
“Sa natad sa enerhiya, magarbohon kita nga nagsunod kita sa Amerika sa paggamit sa geothermal resources. Nakahimo kita sa pagdumala diin pipila ka mga laing nasud mipaambit sa kabatid nga anaa na kanato,” miingon ang Presidente isip tubag sa pangutana nga gipagawas sa tigdumala panahon sa maong kukabildo.
“Adunay bag-ong dapit nga pagasugdan sa sunod tuig sa usa ka kompaniya sa Amerika sa amihanang dapit sa Pilipinas. Adunay dakong deposito kini sa gas ug mitoo kami nga mas dako kini kay sa kasamtangan Malampaya oil fields,” dugtong pa sa Presidente.
Ang Presidente miingon nga pipila sa mga dapit niini kabahin sa gilantugi nga mga lugar, apan ang Pilipinas sa kasamtangan naghimo’g mga lakang aron sa pagdeterminar kon kini miuyon sa United National Convention on Law of the Sea (UNCLOs).
Gipadayag usa sa Presidente ang paglaom nga ang tanang nasud mipirma modapig sa UNCLOs, nga nagtanyag sa exclusive economic zone sa usa ka nasud mokutay sa 200 milyas gikan sa gitawag continental shelf.
“Naglaom kami nga ang tanan mipirma sa United Nations Convention modikit mosunod sa natala sa convention ug tali niini mao ang 200-mile exclusive economic zone.” Miingon si Aquino.
Ang Presidente miingon usab nga adunay daghang mga mekanismo aron sa pagsulbat sa maong isyu nga gilantugi sa maong dapit “tali sa uban” ug ang mga resources nga makuha dinhi mahimong mabenepiso dili lang ang Pilipinas apan lakip ang mga silingang nasud usab. (JPA/PCOO/PIA9/CAL/ZamboSur)
