ni Claro A. Lanipa
MANILA, Nov.14 (PIA) –- Gihatagan ug kahinungdanon ni Presidente Benigno S. Aquino III ang kinahanglanon alang sa mas higpit nga mga lagda sa pagmina dinhi sa Pilipinas aron sa pagpanalipod sa kinaiyahan gikan sa kalagmitan nga kadaot lakip ang kaluwasan sa katawhan.
“Anaa kita karon sa panahon diin hugtanon nato ang mga lada,” miingon si Presidente Aquino atol sa gipahigayong paglantugi mahitungod sa seguridad alang sa ekonomikanhong pag-uswag sa Asia Pacific Economic Cooperation (APEC) CEO Summit didto sa Honolulu, Hawaii, bag-o lang.
Gikutlo sa Presidente ang dugang multa alang sa mga kompaniya sa pamina nga nakalapas sa balaod isip usa sa mga patakaran nga gisagop sa kagamhanan sa Pilipinas.
Gibutyag ni Presidente Aquino nga ang multa alang sa mining safety violations gamay ra kayo kon ikomparar sa ginatos sa milyones nga ilang naangkon.
“Kon itandi sa ganansya nga ilang nahimo, ang multa usa ra ka dyutay’ng gahin,” miingon si Aquino sa diha gipangutanan siya sa tigdumala kon giunsa sa administrasyong Aquino sa paghugut sa mga lagda alang sa operasyon sa mina sa Pilipinas.
Ang Presidente miadto sa Honolulu, Hawaii aron sa pagtambong sa APEC Economic Leaders’ Meeting gikan sa Nobyembre 11-13 nga gipanguhanan sa Estados Unidos sa Amerika. (JPA/PCOO/PIA9/CAL/ZamboSur)
