MANILA, October 19 (PIA) - - Si Presidente Benigno Aquino III makigtagbo sa mga pangulo sa Department of Finance (DOF) ug Bureau of Internal Revenue (BIR) aron pagtuki sa isyu kalabot sa Poverty Eradication and Alleviation Certificates (PEACe) bonds sa kagamhanan.
“Makigtagbo ako sa kalihim sa Finance ug Commissioner sa BIR o ang mga pangulo niini aron pagtuki sa maong isyu ug pagkatapos niini, atong i-review aron matubag nato ang mga complaints nga may kalabotan sa PEACe bonds,” ang presidente nagkanayon.
Gihimo sa presidente ang maong pamahayag atol sa usa ka chance interview sa mga miyembro sa Malacanang Press Corps human siya mitambong sa 100th anniversary sa Philippine Coast Guard (PCG) kagahapong adlawa didto sa PCG headquarters sa Port Area,Manila.
“Aduna usay mga miyembro sa non-government organizations (NGOs) nga nakabenepisyo niini ug naghangyo usab sila nga makigtagbo kanako. Tingali makigtagbo ako sa pipila kanila karong adlawa, o kaha karong semanaha,” miingon ang presidente.
Niadtong Lunes, walo (8) ka mga banko mihangyo ngadto sa Korte Suprema nga mo-isyu ug temporary restraining order (TRO) aron pagpugong sa BIR pag-imposar ug 20 porsiyento nga final withholding tax diha sa P35 bilyon PEACe bonds nga mo-mature karong adlawa.
Ang nasangpit nga mga banko mao kining mosunod: Banco de Oro, Bank of Commerce, China Banking Corporation, Metropolitan Bank and Trust Co., Philippine Bank of Communications, Philippine National Bank, Philippine Veterans Bank ug Planters Development Bank. (ALT-PIA9/Zambo Sur)
