MANILA, October 19 (PIA) - - Gikalipay sa Malacanang ang resulta sa kinaulahiang survey nga gihimo sa Social Weather Stations (SWS) alang sa third quarter sa tuig 2011 diin nagpakita sa dakong pagtaas sa satisfaction rating sa katawhan diha sa administrasyong Aquino.
Ang administrasyon ni Presidente Benigno Aquino III nakakuha sa positive 56% nga satisfaction rating diha sa 1,200 respondents nga gisurvey sa SWS gikan Septembre 4 ngadto sa 7.
Tungod niini, nakaangkon ang administrasyon ug 11 puntos nga bentaha gikan sa mga scores nga nadawat niini sa miaging quarter nga anaa sa positive 45%. Ang SWS mihulagway sa positive 56% net satisfaction rating isip “very good.”
Si Presidential Spokesperson Edwin Lacierda, sa usa ka post-briefing interview kauban sa mga reporters miingon nga gikalipay sa kagamhanan ang maong balita ug nagpasalamat siya sa katawhang Pilipino tungod sa pagdayeg niini sa mga paningkamot sa kagamhanan.
“Mapasalamaton kita sa katawhan tungod sa pag-ila niini sa mga nabuhat sa nasudnong pangagamhanan pagpauswag sa inclusive growth, sa mga paningkamot niini nga makunhuran ang kakabos ingon man pagwagtang sa graft and corruption,” si Lacierda miingon.
“Gihangyo namo ang mga katawhan nga makigduyog sa atong mapadayonong paningkamot sa pagtuman ning maong mga panaad,” matod niya.
Ang Business World, media partner sa SWS, sa niluwatang taho miiingon nga “ang kasamtangang net satisfaction rating sa administrasyon nagpabilin nga mas maayo kaysa milabay nga mga administrasyon sukad nga gisugdan sa SWS ang ilang pag-survey niadtong Pebrero, 1989.
Si Presidential Communications Operations Office Secretary Herminio Coloma Jr., sa usa ka text message ngadto sa maong mantalaan miingon nga kining maong kalamboan makadasig pag-ayo sa administrasyon nga buhaton ang mas labaw pa nga pagpaningkamot aron makab-ot ang atong mga tumong ug damgo….aron pagpadayon sa atong ekonomikanhong pagtubo.” (ALT-PIA9/Zambo Sur)
