DIPOLOG CITY, Sept. 26 (PIA)-- Ang Zamboanga del Norte Provincial Police uban ang pagpakigtambayayong sa Roxas Municipal Police Station nagpahigayon di pa lang dugay ug lecture kabahin sa Crime Prevention didto sa lungsod sa Roxas, Zamboanga del Norte.
Lakip sa mga mitambong sa maong lecture ang mga probationers, parolees; pardonees ug mga Volunteer Probation Aides (VPAs) gikan sa mga munisipalidad sa Sergio Osmeña, Katipunan, Roxas, Manukan, ug Jose Dalman, Zamboanga del Norte.
Nag-unang katuyoan sa maong lecture, nga mapaabot ug mapasabot sa mga partisipantes, ilabi na sa mga parolees ug probationers ang “Anatomy of Crime” ug kon unsaon nga malikayan ug masanta ang usa ka krimen.
Ang hepe sa Roxas Municipal Police Station, Police Inspector Chammer Lacay, nga usa sa mga lecturer mihagit sa mga partisipantes nga dili imakuli ang paglugway ug tabang sa mga otoridad aron masanta ang usa ka krimen, uban ang pag-ingon nga ang pagsumpo sa krimen dili lamang responsibilidad sa kapulisan kundili hangtud na usab sa tanang membro sa komunidad.
Si Lacay nga usa ka Criminologist, migugol ug mas taas nga panahon uban sa mga probationers, parolees ug mga pardonees niadtong nag-intern pa siya sa Parole and Probation Office sa Zamboanga del Norte samtang nagtungha pa siya sa kolehiyo.
Gidasig ni Lacay ang mga partisipantes nga pamatud-an nga duna silay ikatabang ug dili mahimong problema sa komunidad. Sa samang higayon, gitambagan usab sa Chief of Police sa Roxas ang mga partisipantes nga likayan ang kahigayonan nga makahimo ug krimen alang sa pagpuyo sa usa ka malinawong pamilya ug komunidad. (JPA/ATR/PIA9-Zambo Norte)
