ni Alfonso T. Ruda
DIPOLOG CITY, FEB. 19(PIA)--- Kasamtangan unang gisuspende sa Philippine Health Insurance Corporation, Inc., kon Philhealth ang on-line registration ug pag-isyo ug mga card sa ilang pribadong partners.
Kini ang gipahibalo ni Philhealth President ug Chief Executive Officer Dr. Eduardo Banzon dungan ang pagpangawagan sa higpit nga pagrepaso sa “terms of engagement” may kalabutan sa gimbuhaton sa pribadong sektor.
“Nanawagan kami sa temporaryong pagpahunong sa tanang on-line registration activities sa pribadong sector hangtud nga hingpit nang matubag ang tanang isyong may kalabutan sa operasyon,” matod pa ni Banzon.
Hinuon, giklaro ni Banzon, nga taliwala niini, magpadayon gihapon ang mga off-site, stationary registration, ug pag-isyo ug mga card pinaagi sa mga partners nga SM Retail Inc. ug CIS Bayad Center.
Matod pa ni Banson, ang disisyong pagsuspende sa on-line registration ug pag-isyo ug card nahimong dinalian gumikan sa nakitang panginahanglan nga matan-aw ug balik ang operational guidelines kabahin niini, ilabi na ang may kalabutan sa standard procedures ug mga bayronon sa pag-isyo sa Philhealth cards.
Sayo niini, gikuha sa Philhealth ang serbisyo sa pribadong sektor aron mapalapdan ang rehistrasyon ug lugar alang sa pagbayad ug pagdala ug mga bag-ong membro, ilabi na kadtong dunay katakos sa pagbayad sa ilang kaugalingong premium sa National Health Insurance Program.
Walay gasto ang Philhealth sa maong partnership apan gihatagan niini ug gahum ang pribadong partner nga mokolekta ug bayad nga gikonsiderang makatarunganon ug maki-angayon.
“Among repasuhon ang mga gabayan aron masiguro nga nasunod ang kasabutan ug napalambo usab niini ang serbisyo,” matod pa ni Banzon.
Gipasalig ni Banzon sa tanang mga membro sa Philhealth nga ang maong lakang nagtumong lamang nga mapalambo ang relasyon sa Philhealth ug sa pribadong partners, ingon man ang serbisyo niini sa ilang mga membro.
Nanawagan usab siya sa ubang paribadong kompaniya nga mouban sa public-private partnership program sa Philhealth sa labing daling panahon.
Kompiyansa usab si Banzon nga malakip na ang gipalapdang listahan sa PPP sa higayong mapagawas na ang revised guidelines sa on-line registration ug card issuance. (ATR/PIA9-Zambo Norte) .
