ni Claro A. Lanipa
Pagadian City, Feb. 14 (PIA) – Samtang ang pormal nga negosasyon tali sa kagamhanan sa Pilipinas ug Moro Islamic Liberation Front (MILF) gisugdan na sa ika 25 nga hugna sa Kuala Lumpur ning Lunes, si Presidential Adviser on the Peace Process Teresita Quintos Deles mibutyag nga mahinungdanon kaayo ang suporta sa mga stakeholders sa peace process.
“Kitang tanan nasayod nga ang negosasyon sa GPH-MILF anaa na karon sa sustantibong ang-ang,” mao kini ang iyang gisulti atol sa general assembly uban sa mga empleyado sa Office of the Presidential Adviser on the Peace Process (OPAPP) nga gipahigayon ning bag-o lang sa ilang buhatan sa Pasig.
“Ang tulo ka adlaw nga negosasyon sa kalinaw mao ang pinakamalisod nga kukabildo. Busa ato silang suportahan,” dugtong ni Deles.
Si Deles naglaom nga taposon sa kagamhanan ug sa MILF ang pormal nga sultihanay sa usa ka positibong aksyon. “Gusto kita makadungog sa maayong balita pagkahuman sa maong sultihanay, aron makapadayon kita ug maangkon nato ang kalinaw, mopadayon sa unahan, ug makab-ot ang politikanhong solusyon sa dugay na kaayong armadong kagubot.
“Adunay ubay-ubay ka mga hagit sa nagkalain-laing prontera sa pangagamhanan. Apan bisan pa niana naglaom kita sa tul-id nga dalan (straight path) nga maoy mopadayon sa paggiya kanato. Mao ra kini ang bugtong dalan nga makab-ot nato ang kalinaw,” miingon si Deles.
Sa iyang pakigtagbo sa mga nagkalain-laing stakeholders sa nasud, subli niyang gibutyag nga ang administrasyong Aquino naglaom nga makab-ot ang kasabutan sa kalinaw uban sa MILF, sa dili pa ang tunga-tunga sa termino sa Presidente sa 2013. Ang tumong sa Presidente dili aron mopirma sa kasabotan sulod sa iyang termino apan aron sa pag-implementar ug pagtasal sa gipirmahan nga kasabotan sa kalinaw ug dili lang ipasa sa sunod nga administrasyon, gipunting ni Deles.
Taliwala sa mga hagit ug kalisdanan, ang proseso sa kalinaw ‘ nagkinahanglan sa halawom nga pagsabot, pagtoo, ug suporta gikan sa tanan sekta lakip ang relihiyosong grupo, mga negosyante, pribadong grupo ug sa kinatibuk-an ang katilingban,” matod pa ni Deles. (OPAPP/PIA9/CAL)
