ni Alfonso T. Ruda
DIPOLOG CITY, FEB. 14 (PIA)—Si Budget Secretary Florencio “Butch” Abad maisogong nanalipod sa giisyong Budget Circular No. 2011-5 nga nagtakda sa 25-mil pesos nga Collective Negotiation Agreement (CNA) incentives para sa mga empleyado sa gobyerno.
Matod pa ni Abad, ang bag-ong Budget Circular maoy usa ka mahinungdanong reporma nga mag-establisar sa maki-angayon ug maayong paggamit sa pondo sa gobyerno.
“Atong nakita kon giunsa paggasto sa mga ahensiya sa gobyerno ang ilang pondo alang sa mga mahinungdanong programa ug proyekto aron lamang makatigom ug pondo para sa CNA incentives. Kalagmitan, kining maong praktis, na-abusahan sa ubang mga ahensiya, diin ila lang tuyoon pagpadako ang pahat sa Maintenance and Other Operating Expenses (MOOE) aron dako ang mahatag nga CNA incentives pagkatapos sa tuig,” matod pa ni Abad.
“Kining maong praktis nakalawgaw sa sistema sa pagpanuweldo sa gobyerno, diin ang ubang mga ahensiya nanghatag ug dagko kaayong CNA incentives, samtang ang uban, halos sensilyo lamang. Gusto namong ibalik ang ka-angayan sa public sector compensation system,” dugang pa ni Abad.
Ang Budget Circular naglimit usab sa gidaghanon sa MOOE items nga kalagmitan maoy kuhaan sa maong insentibo sama sa mga pagbiyahe; komunikasyon; repair ug maintenance; transportation ug delivery; supplies ug mga materyales; ug utilities. Ang limitasyon, matod pa ni Abad, magsiguro nga mahatod sa ahensiya ang gikinahanglan sa publiko nga dili makompromiso ang serbisyo.
Gihatagan ug punto ni Abad nga ang cost-cutting measures sa MOOE dili magresulta sa kakulang o dili-epektibong operasyon. Dugang pa, wala moabot sa 40 porsiento sa 1.163 bilyones ka mga empleyado sa gobyerno sa tibuok nasod nakadawat sa maong insentibo tungod kay pipila sa mga departamento ug mga ahensiya walay accredited nga union hangtud karon.
Sa pagkakaron, ang administrasyong Aquino milihok na alang sa mas klarong compensation and incentive system sa gobyerno nga ibase sa binuhatan sa mga pangpublikong institusyon ug mga individual.
Di pa lang dugay, nag-isyo si Presidente Benigno Aquino III ug Administrative Order No. 25 nga nagmugna sa task force nga nag-establisar ug unified and integrated Results-Based Performance Management System(RBPMS) nga maoy himoong basehan sa binuhatan sa ahensiya ug sa pagdeterminar sa performance-based compensation and incentives.
“Gusto namong i-improve ug ma-optimize ang operasyon sa gobyerno. Ang pondo sa gobyerno kinahanglang gamiton subay sa gitagan-an niini ug gamiton ug maayo sa mga proyekto sa gobyerno nga maghatag ug benepisyo sa kinabag-an sa katawhan nga atong gi-alagaran. Sumala pa sa Presidente, ang katawhang Filipinhon mao ang atong Boss,” panapos pa ni Abad.(ATR/PIA9-Zambo Norte)
