Ni Alma L. Tingcang
MANILA, December 22 - - Gimandoan ni Presidente Benigno Aquino III ang Department of Budget and Management (DBM) nga mopaluwat sa dugang kantidad nga P1 Bilyon sa kinatibuk-ang P5 bilyon nga Calamity Fund ning tuig aron maseguro ang padayong hinabang alang sa mga biktima sa bagyong Sendong, sa dili pa matapos ang tuig.
Si DBM Secretary Florencio Abad miingon nga ang dugang pondo kuhaon gikan sa savings sa kagamhanan ug unreleased appropriations ubos sa budget ning tuig 2011.
“Pinaagi sa pagbubo ug dugang pondo ngadto sa Calamity Fund, mapaneguro nato ang kinatibuk-ang suporta alang sa ongoing relief ug rehabilitation activities sa mga lugar nga apektado sa Sendong, lakip na ang Cagayan de Oro ug Iligan City,” si Abad miingon.
Sayo niini, si Abad miingon nga ang duolan sa P1.3 bilyon nga nahibilin sa Calamity Fund ning tuig i-release usab aron mapadayon ug ma-implementar gilayon ang disaster management ug rehabilitation projects sa Visayas ug Northern Mindanao, lakip na ang Cagayan de Oro ug Iligan City, Negros Oriental, Lanao del Norte, Misamis Oriental ug Surigao del Sur.
“Ang administrasyong Aquino nagalihok aron paghatod ug gikinahanglan nga hinabang sa mga apektadong lugar. Nakigtambayayong usab ang DBM sa ubang mga ahensiya sa gobyerno aron mapaneguro ang kaluwasan sa mga biktima ug aron mapabalik ang mga gikinahanglan nga serbisyo sa mga komunidad nga gisalanta sa bagyong Sendong,” pahayag ni Abad.
Si Abad miingon nga ang Department of Social Welfare and Development makadawat ug P521.2 million aron pagpanguna sa Early Recovery Services sa mga biktima didto sa Negros Oriental, Misamis Oriental ug Lanao del Norte.
Ang maong budget gamiton usab alang sa Modified Shelter Assistance Project, Cash for Work ug Livelihood Assistance Initiative.
Samtang ang Department of Public Works and Highways modawat ug P208.6 milyon alang sa madaliang pag-repair sa mga nadaot nga tulay ug kalsada sa Negros Oriental ug Lanao del Norte, lakip na ang Mandulog Bridges 1 and 2 sa Cagayan de Oro ug Iligan, ug Tanjay Bridge sa Tanjay City, Negros Oriental.
Ang DOST makadawat usab ug P150 milyon alang sa produksiyon ug pag-instalar sa 1,000 automatic water level sensors sa 18 river basins sa nasod.
Si Abad miingon nga ang Cagayan de Oro River, Iponan River ug Iligan City water systems maoy hatagan ug priyoridad.
Ang kantidad nga P52.8 milyon ihatag usab ngadto sa Local Water Utilities Administration alang sa madaliang rehabilitasyon sa water systems sa Cagayan de Oro.
Sa kinatibuk-ang kantidad, ang P32.4 milyon gamiton aron pagrepair sa source and production facilities samtang P20.4 milyon usab aron pagpabalik sa mga service connections sa concessionaires. (ALT-PIA9/Zambo Sur)
