ni Alfonso T. Ruda
DIPOLOG CITY, DEC. 22(PIA)--- Ang World Bank ug Asian Development Bank mipasalig ug dugang pautang sa Pilipinas para sa rehabilitasyon sa mga lugar nga naka-angkon ug dakong kadaot gumikan sa paghapak sa bagyong si Sendong.
Sa iyang pagpakigpulong atubangan sa mga evacuees sa dakbayan sa Cagayan de Oro niadtong adlawng Martes, si Presidente Benigno Aquino III nagkanayon nga ang Asian Development Bank misaad pagpahulam ug 3-milyones dolyares aron gamiton sa rehabilitasyon sa mga mga lugar nga naapektuhan sa miaging bagyo.
Matod pa sa Presidente, misaad usab ang World Bank nga magpagawas ug 500-milyones dolyares nga loan nga duna lamay ubos kaayong interest rate kon kinahanglanon gyud sa gobyerno ang dugang pondo para tubagon ang uban pang kinahanglanon.
Dugang pa ni Presidente Aquino, ang loan gikan sa ADB, una nang gitanyag human ang Pilipinas mi-invest sa nasangpit nga bangko. Ang maong kantidad magamit sa nasod aron gamiton batok sa natural nga katalagman.
“Gawas niining maong pondong mapahimuslan sa gobyerno,“ matod pa sa Presidente,” ang nasod duna pay 1.17 bilyones ka pesos nga Calamity Fund ug uban pang pondong mahimong magamit alang niini. Hinuon, sumala pa sa presidente ang paggamit sa laing tinubdan sa pondo mag-agad lamang sa rekomendasyon sa iyang economic team.
Gawas sa hinabang-salapi, nakadawat usab ug hinabang ang Pilipinas gikan sa mga nasod sa Estados Unidos, Japan, Tsina, Rusya, Espanya ug uban pang mga nasod.
Sayo niini, gibisita sa Presidente ang mga dakbayan sa Cagayan de Oro, Iligan, ug Dumaguete aron personal nga makita ang nagpadayong rehabilitasyon ug pagpang-apod-apod sa hinabang ngadto sa mga biktima sa bagyong si Sendong. Iya usab nga gipangunahan ang pagpanghatag ug relief goods sa mga evacuees sa mga apektadong lugar.
]
Sumala pa sa National Disaster Risk Reduction Management Council, miabot na sa duolan sa usa ka libo ka tawo ang namatay sa rehiyon 10 gumikan sa pagbaha nga dala sa bagyong si Sendong. (ATR/PIA9-Zambo Norte)
