ni Alfonso T. Ruda
DIPOLOG CITY, JUNE
11(PIA)---Nakakuha
si Presidente Benigno Aquino III ug 2.5 bilyones dolyares nga investment pledges
gikan sa mga magpapatigayong iyang gikahinagbo sa iyang pagbiyahe didto sa
United Kingdom ug Estados Unidos niadtong miaging semana.
Ang
maong impormasyon gibutyag ni Presidente Aquino sa iyang paghidangat sa Ninoy
Aquino International Airport niadtong Domingo sa buntag.
Matod
pa ni Presidente Aquino, katunga sa kinatibuk-ang investment pledges naggikan
sa Rolls-Royce, Asea Gaz Asia Ltd ug commodities trading giant nga Glencore,
tag-iya sa Philippine Associated Smelting and Refining Corporation (PASAR), nga
parehong nakabase sa UK.
Ang
Glencore nagplanong magpalapad sa ilang smelting capacity pinaai sa pag-invest
ug 600 milyones dolyares; ang Gaz Asia magtrabaho uban sa Aboitiz equity ug
mag-invest ug 150 milyones dolyares aron i-develop ug planta nga mag-usab sa
mga biyang butang nga mahimong liquid bio-methane; ug Rolls Royce nga mipirma
ug 280-milyones dolyares nga service contract uban sa Cebu Pacific alang sa
pagpalit ug serbisyo sa mga bag-ong makina sa ayroplano.
Ang
laing katunga sa investment pledges naggikan sa mga patigayon nga nakabase sa
Estados Unidos sama sa GN Power Limited nga nagplanong mobutang ug 300-megawatt
nga planta sa Bataan nga nagkantidad ug 1 ka bilyon ka dolyar; Underwriters
Laboratories, Inc., nga mag-invest ug 150 milyones sa global technology
research center sa Manila; ug ang Citigroup ug USAid nga misugyot nga ilakip
ang mobile financial program nga magdala benepisyo sa mobile banking ngadto sa
kabaryohan.
“Sa
kinatibuk-an ang kantidad sa patigayon nga mosulod gikan sa mga kompaniyang
atong gikahinagbo didto sa Britanya ug Amerika dili moubos sa 2.5 bilyones
dolyares o kapin kon kulang 100 ka bilyon ka pesos,” matod pa ni Presidente
Aquino.
Midugang
pa ang Pamuno Nasod nga gawas sa papalig-on sa ekonomiya sa Pilipinas pinaagi
sa paghatag ug trabaho ug panginabuhian, kining maong mga investments labi pa
usab nga magpalig-on sa relasyon sa Pilipinas uban sa Britanya ug Amerika.
“Trabaho
ang katumbas niining maong mga numero; trabahong magdala ug pagkaon sa talad-kan-anan
sa matag Filipino. Ug uban niining maayong ekonomikanhng balita, nagbunga usab
ug mas halawom pang panaghigala ang atong biyahe uban sa United Kingdom ug
Estados Unidos,” panapos pa ni Presidente Aquino.(ATR/PCOO/PIA9-Zambo Norte)
