ni Alfonso T. Ruda
DIPOLOG CITY, MAY 16(PIA)---
Nagpahayag ug kompiyansa
ang Malakanyang nga kayang sulbaron sa Department of Agriculture ang problema
sa banana export uban sa Tsina.
“Naglaum
kami nga masulbad sa DA team nga makigsulti uban sa ilang mga kaatbang sa Tsina
panahon sa biyahe ang isyo kabahin sa
problema sa banana export,” matod pa ni Deputy Presidential spokesperson
Abigail Valte, sa gipahigayong regular press briefing sa palasyo.
Ang
tigpamaba sa palasyo misuporta sa panawagan sa pipila ka sektor nga mangita ug
laing merkado ang export sa nasod, sumala sa unang gi panawagan ni Presidente
Benigno Aquino III.
“Gilantaw
na karon ang ubang merkado kun diin asa puwedeng dalhon ang atong mga export,”
matod pa ni Valte.
Ang
mga opisyales sa DA nakatakdang mobiyahe sa Tsina karong semanaha aron susihon
ang giingong nangalata nga saging gikan sa Pilipinas didto sa pantalan sa Tsina
isip tubag sa alegasyon nga kontaminado kini sa peste.
Gimanduan
ni Agriculture Secretary Proseso Alcala ang mga opisyales sa Bureau of Plant
Industry nga moadto sa Tsina aron susihon ang banana export ug sutaon ang pagduda
sa kontaminasyon. Sa samang higayon, giimbitahan usab ni Alcala ang mga quarantine
officials sa Tsina nga inspeksyonon ang planstasyon sa saging ug pantalan dinhi
sa nasod.
Ang
Pilipinas mao ang nag-unang exporter ug saging, ug kadaghanan sa maong prutas
nia gitanom sa Mindanao. Lakip sa nag-unang
merkado sa saging mao ang Japan, South Korea, Tsina ug New Zealand. Niadtong
2010, ang kinatibuk-ang kita gikan sa export sa saging gikan sa preskong
Cavendish nga saging miabot ug 720 milyones dolyares.
Ang
Tsina mao ang ikaduhang labing dakong merkado sa saging gikan sa Pilipinas,
sunod sa Japan. Ang talaan nagpakita nga hangtud niadtong Pebrero 2012, ang na-export
sa Pilipinas nga saging ngadto sa Tsina nagrepresentar ug 19 porsiento sa
kinatibuk-ang export panahon sa unang duha ka bulan niining tuiga.(ATR/PCOO/PIA9-Zambo Norte)
