ni Alfonso T. Ruda
DIPOLOG CITY, MAY
11(PIA)---Subling gipahayag
ni Secretary Rogelio Singson ang higpit nga implementasyon sa nauna niyang
kamanduan may kalabutan sa pagbutang sa gikinahanglang billboard sa tanang
public work projects isip tipik sa transparency effort sa Department of Public
Works and Highways (DPWH).
“Akong
namatikdan nga hangtud karon duna pa gihapoy mga project billboards nga wala
maayo pagbutang ug pipila usab sa among mga proyekto walay mga billboard nga
dunay standard nga gidak-on nga 4 x 8 ka tiil, mao nga akong gimanduan ang DPWH
Regional Directors, Project Directors ug mga District Engineers nga sigurohon
nga kompleto sa gikinahanglang project billboard ang tanang proyekto nga
gipatuman sa DPWH sa ilang tag-tagsa ka mga hurisdiksyon,” matod pa ni Singson.
Matod
pa ni Singson, dili usab nila itugot ang pagbutang ug political billboard sulod
sa 100 ka metros sa dili pa ug lapas sa nahimutangan sa tanang proyekto sa DPWH
ug taliwala sa project limit o sulod sa road-right-of-way.
Dugang
pa niini, dili usab nila tugtan ang mga DPWH contractors nga mbotuang sa ngalan o larawan sa politiko sa
ilang mga ekipos o magdala ug political billboard sa ilang mga ekipos.
“Mahinungdanon
kaayo kining maong mga billboard, sanglit maghatag man kini ug impormasyon kabahin
sa ngalan sa contractor, petsa sa pagsugod sa proyekto, kanus-a kini matapos,
kantidad sa proyekto, ngalan sa consultant alang sa mga proyekto nga gipondohan
sa langyaw; ang buhatan sa DPWH nga nag-implementar ug ang gikuhaan sa pondo
niini,” dugang pa ni Singson.
“Pipila
sa nagpadayong proyekto dunay mga billboard apan kulang sa impormasyon,” matod
pa sa Kalihim.
Gimando
usab ni Singson ang presensiya sa mga flagmen 24/7 aron magdumala sa bul-og sa
trapiko sa nagpadayong proyekto, ilabi na niadtong nahimutang sa mga lugar nga
daghang nagbiyahe.
Gawas
niini, gi-awhag ni Singson ang publiko nga monitoron ang mga public work projects
ug itaho ang ilang nakitang depekto sa konstruksyon sa proyekto pinaagi sa
telepono nga nakabutang sa billboard o kaha sa DPWH 24/7 hotline nga 165-02(ATR/PCOO/PIA9-Zambo Norte)
