Ni Alma L. Tingcang
MANILA, April 27 (PIA) - -Gikalipay
sa Malacanang ang taho nga mikumpirmang adunay dakong deposito sa natural gas
sa Recto Bank ug matod pa makasuporta kini sa panginahanglan sa enerhiya sa
atong nasod.
Si Presidential
Spokesperson Edwin Lacierda miingon sa usa ka press conference didto sa Malacanang
nga samtang gikalipay sa Palasyo ang maong balita, magpaabot kini sa taho gikan
sa service contractors nga maoy nag-explore sa maong area.
“Magpaabot kita sa ilang pagbalita.
Si Energy Secretary Almendras nagpaabot sa ilang taho. Apan sigurado na kini
nga usa ka source sa energy alang kanato ug ang natural gas mas barato busa maayong balita kini,” si Lacierda nagkanayon.
“Kumpiyansa kita nga kung
mapamatud-an kini, dako kaayo kining tabang sa atong panginahanglan ug enerhiya,”
matod niya.
Sa dihang gipangutana siya
kung nabalaka ba sila kalabot sa maong kaplag tungod kay ang China miangkon
usab sa Recto Bank, si Lacierda miingon, “Kanunay natong giingon nga ang Recto
Bank nahasulod sa 70 nautical miles sa atong dagat busa nagtuo kita nga atoa
kini.”
Apan miingon siya nga dili
na modugang ug komentaryo tungod kay usa kini ka sensitibong isyu ug bahala na
ang Department of Foreign Affairs nga mo-handle niini.
Sumala pa sa usa ka
UK-based exploration company, ang resulta sa seismic surveys nga gipahigayon niadtong
2006 nagpakita ug indikasyon sa mean volume nga 3.4 trillion cubic feet (TCF)
nga gas gikan sa balas nga gi-test didto sa tulo ka atabay nga gikalot sa Recto Bank.
Ang 2006 3D seismic survey
nagpakita nga ang maong deposito sa gas mas dako ug 21 porsiyento kaysa
Malampaya gas field.
Ang Recto Bank nga naila
usab isip Reed Bank kabahin sa territorial dispute tali sa Pilipinas ug China
nga naglangkob sa Spratly Islands sa West Philippine Seas.
Ang kagamhanan sa
Pilipinas miingon nga ang pagpanag-iya sa Recto Bank dili ikalalis tungod kay
nasulod siya sa 70 nautical miles west sa Palawan ug mas duol sa mainland sa
nasod kung ikumpara sa Scarborough Shoal. (ALT-PIA9/Zambo Sur)
