ni Alfonso T. Ruda
DIPOLOG CITY, APR. 16(PIA)--- Gidayeg ni Interior and Local Government Secretary Jessie Robredo ang walay hunong nga paggukod sa Philippine National Police-Highway Patrol Group(PNP-HPG) sa mga carjacking syndicates nga nagresulta sa pag-ubos sa insidente sa carjacking ug halos 50 porsiento karong bulan sa Marso.
Base sa report nga giduso ni PNP-HPG Director, Chief Superintendent Leonardo Espina sa buhatan sa DILG, si Robredo miingon nga duna lay 53 ka carjacking nga nahitabo niadtong bulan sa Marso karong tuiga kumpara sa 105 nga nahitabo niadtong Marso sa miaging tuig.
“Akong giila ang way-pagkakapoy nga pagpaningkamot sa Highway Patrol Group nga nagresulta sa padayong pag-ubos sa kaso sa carjacking,” matod pa niya, uban ang pag-awhag sa PNP-HPG pagpadayon sa ilang kasibot, dili lamang aron madakpan ug mapasakaan ug kaso ang mga malapason, kundili aron usab mabawi ang mga gipangkawat nga mga sakyanan.
Sa pagtoo ni Robredo, ang padayong pag-ubos sa kaso sa carjacking nagumikan sa implementasyon sa mga anti-carjacking initiatives sama sa pagbutang ug checkpoints sa mga kadalanan padulong sa mga pantalan, hugtanong koordinasyon uban sa mga anti-carnapping units ug operationalization sa HPG SMS Info Text nga nagpadayon na sa pagkakaron.
Gidayeg usab ni Robredo ang mga dagkong kalampusan sa PNP-HPG sama sa pagkadakop ni Francis Humiding kang kansang mga kalihokang-kriminal naglakip sa highway robbery ug carnapping didto sa checkpoint sa Provincial Road sa Ramon, Isabela ug pagkasikop ni Alberta Lising nga nalambigit sa carnapping sa Rodriguez, Rizal, diin nakuha gikan sa iyang posisyon ang mga kinawat nga mga motorsiklo ug picklocks.
Gihatagan ug punto ni Robredo nga ang gikatahong mga kaso sa carnapping wala maglakip niadtong gikataho sa mga istasyon sa kapulisan nga kaso sa carnapping nga sa gihimong imbestigasyon, napamatud-ang kaso lang sa estafa nga gihimo aron maka-claim ug insurance, mga gi-prenda sa casino ug uban pang gipang-prendang sakyanan, kapakyas pagbayad sa binulang obligasyon, ilabi na kadtong naglambigit sa mga motorsiklo ug uban pang susamang kahimtang.
Ang report nagpakita nga miubos usab ang gidaghanon sa gipangawat nga mga motorsiklo gikan sa 51 niadtong Marso 2011 ngadto sa 33 porsiento kon 51 na lang niadtong Marso 2012. Samtang miubos usab ang kaso sa gipang-carnap nga mga 4-wheeled vehicles ug 64.81 porsiento kon 19 ka kaso niadtong Marso niining tuiga, kumpara sa 54 ka kaso niadtong Marso 2011.
Sa laing bahin, 92 porsiento kon 49 sa gi-carnap nga mga sakyanan ang gikawat samtang nakaparada samtang ang uban pugsanong giilog gikan sa mga tag-iya pinaagi sa pagtion ug pusil kanila.
Kabahin sa mga rehiyon nga dunay pinakadaghang kaso sa carnapping, numero uno ang National Capital Region, ug nag-una ang Manila sa mga lugar kalagmitang nahitabo ang carnapping ug gisundan sa dakbayan sa Quezon.(ATR/PCOO/PIA9-Zambo Norte)
