ni Alfonso T. Ruda
DIPOLOG CITY, APR. 4(PIA)--- Si Presidente Benigno Aquino III subling mipahibalo sa iyang mga kaubang membro sa Association of Southeast Asian Nations (ASEAN) nga giratipikahan na sa kagamhanan sa Pilipinas ang ASEAN Plus Three Emergency Rice Reserve (APTERR) agreement nga maoy magpalig-on sa seguridad sa pagkaon sulod sa rehiyon.
“Isip indikasyon sa among nakighiusang tinguha nga madala ang maayong kalidad sa kinabuhi sa atong katawhan, malipayon nakong ipahibalo kaninyo nga giratipikahan na sa Pilipinas ang ASEAN Plus Three Emergency Rice Reserve agreement niadtong Marso 2012,” matod pa ni Presidente Aquino sa iyang pagpakigpulong sa Plenary Session sa gipahigayong 20th Summit didto sa Cambodia.
Gilantaw karon sa Pilipinas ang pagpatuman sa mga programa ilalom sa maong inisyatibo para sa benepisyo sa katawhan nga nia sulod sa rehiyon sa Asya.
Ang ASEAN partners nga kauban sa maong kasabutan mao ang mga nasod sa Tsina, Japan ug South Korea nga nagpahayag ug kaandam pagpondo sa rice reserve agreement.
Ilalom sa maong kasabutan, ang mga membro sa ASEAN ug Tsina, Japan ug South Korea magpagawas ug tagsa ka milyon ka dolyar aron magsilbing endowment fund.
Ang Indonesia, Brunie Darrusalam, Malaysia, Pilipinas, Thailand, Singapore ug Vietnam mag-amot-amot ug tag 107,500 dolyares samtang ang Cambodia, Laos ug Myanmar motampo usab ug tag 83 mil dolyares matag usa.
Ang kasabutan nanawagan sa 13 ka mga nasod nga magpondo ug 787 mil ka metriko toneladang bugas isip buffer batok sa kalit nga pagkulang sa supply sa bugas ug produksyon sa humay.(ATR/PCOO/PIA9-Zambo Norte)
