ni Alfonso T. Ruda
DIPOLOG CITY, APR. 13(PIA)---Subling gilig-on sa Australia ang ilang saad nga makigtinabangay sa mga ekspertong Filipino aron mapalig-on ang kapabilidad sa nasod batok pagtubag sa unsa mang kalamidad nga posibling mohapak sa tibuok kapupud-an.
Sa pahayag nga gibasa human sa iyang miting uban kang Presidente Benigno Aquino III sa Malakanyang, isip tipik sa iyang State Visit sa Pilipinas, ang Governor General sa Commonwealth Republic of Australia nga si Quentin Bryce nagkanayon, nga andam ang Australia nga makig-ambit sa iyang kahibalo ug katakos may kalabutan sa kaandam batok sa kalamidad sanglit nakasinati man niining susamang katalagman ang ilang nasod.
“Isip usa ka nasod nga nakasabot sa kasakit ug kadaot nga dulot sa mga natural nga katalagman sama sa bagyo, baha, sunog, andam ang Australia nga makigtinabangay sa Pilipinas sa pagpangandam ug pagmugna ug komunidad nga makabarog batok sa katalagman nga posibling moigo sa nasod,” matod pa ni Bryce.
Sa samang higayon, gitunol usab ni Bryce ang pakisimpatiya ug pahasubo sa iyang nasod ngadto sa mga biktima sa bagyong si Sendong nga mihapak sa Mindanao niadtong miaging tuig.
“Tugti akong gamiton ko kining maong higayon aron itunol ang akong personal nga pahasubo sa pahasubo nga gitunol sa kagamhanan sa Australia sa kadako sa mga nangawala ug nadaot gumikan sa bagyong si Sendong nga nagdulot ug dakong pagbaha niadtong Disyembre, matod pa ni Bryce.
Midugang pa si Bryce nga nalipay ang iyang nasod nga nahimong tipik sa paghatag ug hinabang sa mga nahimong biktima sa maong trahedya.(ATR/PCOO/PIA9-Zambo Norte)
