ni Alfonso T. Ruda
DIPOLOG CITY, MAR. 7(PIA)---Gimugna karon sa Regional Development Committee sa National Economic Development Authority Board ang Special Committee for Mindanao Power, atubangan sa panginahanglan nga magbutang ug malungtarong tinubdan sa supply sa kuryente para sa Mindanao.
Si Socio-economic Planning Secretary ug RDCom Chair Cayetano W. Paderanga Jr., nagkanayon nga espesyal nga komiti maoy tahasan paghimo ug rekomendasyon alang sa kasulbaran sa problema sa enerhiya, ilabi na limitadong kapasidad pagsupply ug kuryente ug pagsalig sa Mindanao sa hydropower.
“Gituki sa RDCom ang supply sa kuryente sa Mindanao ug ang panginahanglan niini aron makapagawas ug kongretong rekomendasyon para malikayan ang kakulangan sa supply sa kuryente sa umaabot nga panahon,” matod pa ni Paderanga.
Si Davao City Mayor Sarah Duterte, kinsa mao ang Chair sa RDCom Area Committee for Mindanao maoy napiling mangulo sa espesyal nga komiti ug mag-organisa sa iyang mga membro.
Sa labing ulahing miting sa RDCom, gikataho nga ang ang panginahanglan sa kuryente dinhi sa Mindanao gilaumang mosaka sa tinuig nga rate nga 4.56 porsiento gikan sa 2011 ngadto sa 2030. Ang panginahanglan gilaumang mosobra sa kasamtangang generation capacity pag-abot sa tuig 2014 kung wala nay mapabarog nga dugang power generation capacity.
Gihatagan ug punto nga ang sobrang pagsalig sa Mindanao sa hydropower, nga mao ang tinubdan sa katunga sa “generation mix” sa rehiyon, makapahimo sa supply sa kuryente nga mahuyang batok sa hulaw ug pag-ubos sa level sa tubig sa mga watershed areas.
“Maoy gihimong pananglitan ni Duterte ang pag-ubos sa level sa tubig sa Lake Lanao, kang kansang mga planta ubos na kaayo ug kapasidad pag-operate, ug misugyot sa Department of Energy ug Department of Environment and Natural Resources nga mohimo ug pagtoon kabahin sa co-management sa watershed,” matod pa ni Paderanga.
Isip usa sa mga inter-agency committees ilalom sa NEDA Board, ang RDCom, gipanguluhan ni Paderanga ug gilangkuban sa mga Kalihim sa Department of Budget and Management, ug Department of Interior and Local Government, Chairs sa RDCom area Committees for Luzon, Visayas ug Mindanao ug upat (4) ka Regional Development experts nga magrepresentar sa academe ug pribadong sector.(ATR/PCOO/PIA9-Zambo Norte)
