Ni Alma L. Tingcang
PAGADIAN CITY, March 22 - - - Ang kagamhanang Aquino magpadayon pagtuman sa ilang responsibilidad taliwala sa mga pagsaway ug gibutang sa huna-huna ang mas importanteng mga buluhaton aron pagpalambo sa ekonomiya ug mapaneguro ang kaayohan sa katawhang Pilipino, kini sumala pa sa spokesman sa Palasyo. Kung unsa man ang mga pagsaway nga gitumong ngadto sa gobyerno, si Presidential spokesman Edwin Lacierda miingon kagahapon atol sa briefing didto sa Malacanang, nga ang mas importante mao nga ang kagamhanan nakapatuman sa mga reporma nga nakabenepisyo sa atong ekonomiya ug ngadto sa mga kabos. “Ang ubang nasod nakakita sa atong mga economic indicators ug mao kana ang rason nganong adunay daghang langyaw’ng magpapatigayon o foreign investors karon nga ania sa atong nasod,” si Lacierda nagkanayon. Matod pa ni Lacierda, si Presidente Benigno Aquino III dili apektado sa mga pagsaway ug wala niya giisip kining mga komentaryo nga personal tungod kay kung anaa ka sa pagserbisyo publiko, makaangkon ka gayud ug pagsaway gikan sa mga kritiko. “Ang pinakamaayong ebidensiya mao nga diretso kitang tubagon sa presidente, mao kana ang iyang estilo. Wala niya giisip nga personal ang mga pagbatikos,” pahayag ni Lacierda. “Nasayod siya nga aduna gayud mga pagsaway, lakip kana sa trabaho ug kinsa kadtong anaa sa serbisyo publiko kinahanglan makat-on ning gitawag ug ‘‘pachydem skin“ tungod kay makaani ka gayud ug pagsaway,” panapos nga pahayag ni Lacierda.(ALT/PIA9-Zambo Sur) |
