ni Alfonso T. Ruda
DIPOLOG CITY, MARCH 17(PIA)--- Uban sa tinguha sa gobyerno nga mahunong na ang kausaban sa klima nga migrabe karon gumikan sa greenhouse gas nga gibuga sa mga sakyanan, gipangunahan kagahapon ni Executive Seceretary Paquito Ochoa Jr., ang paglusad sa bag-ong matang sa commuter bus nga gidesinyo nga padaganon pinaagi sa bateriya.
Ang pagpaila sa battery-powered bus nga gitawag ug e-Bus nahimong posible pinaagi sa programang ” Victory Over Climate Changee” nga hiniusang gipatuman sa Climate Change Commission, diin ang Chairperson mao si Presidente Benigno Aquino III ug Victory Liner, usa sa nag-unang operator sa transportasyon sa nasod.
Ilalom sa Akta Republika nga mas naila isip Climate Change Act of 2009, ang Komisyon dunay kaakuhan sa pag-promote ug paghatag ug suportang teknikal sa lokal nga pagtoon ug mga programang pangkalambuan nga makatabang pagtubag sa kausaban sa klima.
“Among gitan-aw ang eBus nga usa sa mga behikulo nga magdala sa pagpaningkamot sa kagamhanan nga matubag ang hinungdan sa kausaban sa klima. Ang paggamit ug gasolina o diesel sa atong mga sakyanan maoy gitumbok sa siyensa nga usa sa mga hinungdan sa kausaban sa klima, sanglit nagprodyus man kini ug carbondioxide,” matod pa ni Ochoa.
Si Sec. Mary Ann Lucille L. Sering, Chairperson sa Climate Change Commission, nagkanayon nga ang paggamit ug sakyanang gipadagan sa bateriya maoy usa sa mga estratehiya ilalom sa National Climate Change Action Plan nga makatabang sa pagpakunhod sa pagbuga ug greenhouse gas sa kahanginan.
Matod pa usab niya, ang imbentaryo sa greenhouse gas sa Pilipinas nagbutyag nga
Ang sektor sa transportasyon mao ang nagbuga ug pinakadaghang greenhouse gas. “Dili na kinahanglang mahimo kang eksperto aron imong mahibaw-an ang problema sa polusyon sa mga siyudad, ilabi na sa Metro Manila. Tan-awa lang ang kadalanan ug imong makita ang mga sakyanang pampubliko nga nagbuga ug itom kaayong aso. Dili lang kana makadaot sa atong klima, kundili makadaot usab kini sa atong panglawas,” dugang pa ni Sering.
Matod pa ni Sering, dako kaayo ang panginahanglan sa atong paglambigit sa pribadong sektor sa atong pagpaningkamot batok sa kausaban sa klima. Naglaum ang Kalihim nga sagupon usab sa mga kompaniya sa transportasyon ang susamang estratehiya.
Ang eBus gipadagan sa 400 “Winston” rare-earth Yttrium Lithium-ion nga bateriya nga makadagan sa gikusgon nga 90 kilometros matag takna. Ang bus dunay 26 ka lingkuranan ug puwedeng mokarga ug 52 ka mga pasahero.(ATR/PCOO/PIA9-Zambo Norte)
