ni Alfonso T. Ruda
DIPOLOG CITY, MARCH 19(PIA)--- Kapin kon kulang 3 mil ka mga sitios ang gilaumang makabenpisyo sa padayong pagpaningkamot sa gobyerno nga mahatagan ug sugang-dagitab ang mga hilit nga bahin sa nasod.
Kini ang gipahayag ni Presidente Benigno Aquino III human nga malampusong nahatagan ug sugang-dagitab ang pasiunang gitarget nga 1,520 ka mga sitios sa katapusang quarter sa tuig 2011.
Ang Pangulo, sa iyang pagpakigpulong atol sa graduation rites sa Philippine Military Academy Bagwis Class 2012 kagahapon miingon, nga kining maong programa makatabang ug dako sa atong mga kasundalohan, partikularmente ang mga bag-ong migradwar nga mahimo nang tipik sa atong Armadong Kusog sa PIlipinas sa pagpanalipod sa atong nasod batok sa mga dautang elemento sa atong katilingban.
Base sa data nga gihuptan sa Department of Energy (DOE) ug National Electrification Administration (NEA), duolan sa 36 mil pa ka mga sitios sa tibuok nasod ang nagpabilin pang nag-antus sa kangitngit sanglit napasagdan man kini sa nakalabay nga administrasyon- problemang gustong hatagan ug solusyon sa Presidente.
Isip tubag, niadtong 2011, naggahin ang gobyerno ug 1.3 bilyones ka pesos aron hatagan ug elektripikasyon ang pasiunang target nga 1,300 ka mga sitios sa katapusang quarter niadtong tuiga. Ang pagpaningkamot sa gobyerno nagbunga ug mas maayong resulta sanglit, sulod lang sa 90 ka adlaw , miabot man sa 1,520 ka mga sitios ang napasug-an sa DOE ug NEA.
“Ang kanhi duolan sa 1 ka milyon ka pesos kada sitio nga gigahin sa gobyerno matag sitio, nahimo kini nato sa tag 700 mil pesos lang nga pondo matag sitio. Kini maoy pagmatuod nga pinaagi sa atong pagsubay sa matarong nga dalan sa pang-gobyerno, atong natubag ang panginahanglan sa katawhan dili sa tukmang panahon kundili sa panahon nga kini gikinahanglan,” matod pa sa Presidente.
“Sa laktod nga pagkasulti, ang kanhi gibana-banang 1 ka milyon, nahimong 700 mil pesos na lang, nakadaginot kita ug halos tunga sa milyon; idugang kini sa pondo para sa kuryente karong tuiga. Dili moubos sa 3,000 ka mga sitios ang atong gilaumang mapakabitan sa national grid,” matod pa ni Presidente Aquino.(ATR/PCOO/PIA9-Zambo Norte).
