ni Claro A. Lanipa
Pagadian City, Mar. 27 (PIA) – Bakasyon sa berano na usab ug daghan sa mga kabataan ang nagplano mobakasyon sa gawas sa nasud. Mao usab kini ang panahon nga anaa sila sa pinaka delikadong kahimtang gikan sa mga human traffickers ug sindikato nga mangita ug tawo nga ilang biktimahon ilabi na sa mga menor de edad ug walay kauban nga ginikanan.
Aron sa pagpanalipod sa mga kabataan nga mahimong biktima sa human trafficking, ang Department of Social Welfare and Development nagpahimangno sa mga ginikanan o nagbantay sa mga kabataan sa pagkuha ug travel clearance alang sa mga kabataan, 17 años pa ubos ang pang-edaron, kinsa moadto sa gawas sa nasud nga mag-inusara ug walay kauban.
Ang maong travel clearance mahimong mokuha sa mga buhatan rehiyonal sa DSWD sa tibuok nasud.
Ang paghatag sa travel clearance, giasoy ubos sa Special Protection of Children Against Abuse, Exploitation and Discrimination Act ug sa Philippine Passport Act of 1996,” matod pa ni DSWD Secretary Dinky Soliman.
Ang travel clearance ihatag sa DSWD ngadto sa usa ka Pilipinong menor de edad nga moadto sa laing nasud nga walay kauban nga ginikanan ug sa usa ka ilehitimong bata nga mobiyahe uban sa iyang amahan. Ang linawas pagpakita sa menor de edad sa pagkuha sa maong clearance dili na kinahanglan.
Ang mga kinahanglanon aron sa paglukat ug travel clearance sa menor de edad mao ang mosunod: accomplished application form, photocopy sa birth certificate gikan sa NSO, sinulat nga pagtugot sa ginikanan o nagbantay sa bata, photocopy sa marriage certificate sa ginikanan gikan sa NSO, duha ka colored passport size nga litrato sa bata nga nakuha sulod sa milabay’ng unom ka bulan, ug photocopy sa passport sa mokuyog sa bata.
Ang application alang sa travel clearance uban sa mga gikinahanglan mga dokumento isubmitir sa ginikanan o legal nga nagbantay sa bata o otorisadong representante ngadto sa pinaka duol nga buhatan rehiyonal sa DSWD. Ang application form puede usab i-download sa DSWD website (www.dswd.gov.ph)
Ang paglukat sa travel clearance adunay balayronon sa P300 nga naglangkob sa usa ka tuig, ug mahimong balido alang sa multiple travels sulod sa maong balidong panahon, ubos sa mga kondisyones sa maong travel clearance nga gihatag ug wala giusab.
Samtang, ang menor de edad nga mogawas sa nasud inubanan sa iyang ginikanan o legal nga nagbantay, ug kadtong mga ginikanan nga nagserbisyo sa langyaw’ng nasud, nagpuyo sa laing nasud kon imigrante, nga naghupot sa balidong pasaporte sama sa dependent’s visa/pass/identification card o permanent resident visa/pass/identification card dili na kinahanglan molukat ug travel clearance.
Base sa natala sa DSWD, 28,729 ka mga travel clearance ang gihatag sa mga menor de edad nga miadto sa gawas sa nasud sa 2011.
Ang panahon gikan sa bulan sa Marso hangtod Mayo maoy pinaka daghan nga mokuha ug travel clearance alang sa mga menor de edad nga mogawas sa nasud tungod kay bakasyon man ang mga tulunghaan. (DSWD/PIA9/CAL)
