Ni Alma L. Tingcang
PAGADIAN CITY, Mar 19 (PIA) – Ang Malacanang mipahayag nga ang mga ahensiya sa gobyerno nagpadayon sa ilang pakigbatok sa air pollution sa nasod ug nagtutok diha sa pagkontrolar sa smoke emissions sa mga sakyanan ug pagwagtang sa mga pekeng emission testing centers.
Ang Philippine Medical Association (PMA) nanawagan sa kagamhanan ning bag-o pa lamang aron pagpalapad sa kampanya batok sa air pollution nga mihulga sa kinabuhi sa 14 milyon residente sa Metro Manila matag adlaw.
“Gihingusgan sa presidente ang pagpalambo sa mga lakang sa gobyerno aron pagbatok sa polusyon ug matod pa, diha kita magtutok sa simpleng solusyon,” si Deputy Presidential Spokesperson Abigail Valte miingon sa ingon sa interview sa DZRB Radyo ng Bayan.
Angay hinumduman nga 80 porsiyento sa air pollution gikan sa mga mobile sources ug ang nahibiling 20 porsiyento gikan sa mga power plant ug uban pa, matod ni Valte.
“Diha sa 80 porsiyento, daghan mga ahensiya ang nagtambayayong aron pagsuta unsa ang ilang angay buhaton,” dugang pahayag ni Valte.
Ang nag-unang lakang sa gobyerno mao ang pagwagtang sa mga smoke-belching nga sakyanan diha sa mga kadalanan ug pagserado sa mga emission testing centers nga wala mo-comply sa mga regulasyon sa kagamhanan.
Ang mga emission testing centers posibleng mag-isyu ug sayop nga numero kalabot sa mga sakyanan nga ginatesting matag adlaw ug giaksiyonan na kana sa kagamhanan. Si Valte miingon nga nakumpromiso niini ang kampanya sa gobyerno batok sa air pollution sa Metro Manila ug dugang pa nga ang mga hingtungdang ahensiya kinahanglan dili motugot nga buksan ang mga testing centers nga wala nagtuman sa regulasyon.
Busa adunay crackdown nga gihimo ang Land Transportation office ug ang Department of Environment and Natural Resources alang sa mga emission testing centers. Ug ingon man giawhag kadtong adunay nahibaloan nga susama niining mga testing centers nga ireport kini aron aksiyonan sa hingtungdang ahensiya sa kagamhanan.
Sumala pa ni Valte nga ang DENR ug LTO nanguna sa mga kalihokan sa emission testing ug ang level sa air pollution karon nakunhoran na sukad sa panahon nga milingkod na si Presidente Aquino sa tuig 2010. (ALT-PCOO/PIA9-Zambo Sur)
