ni Alfonso T. Ruda
DIPOLOG CITY, MAR.5(PIA)--- Si Presidente Benigno Aquino III mimando karon sa Department of Transportation and Communication (DOTC) nga dalion ang pagpabarog sa integrated mass transport network alang sa daling paglambo sa nasod.
Ang Orden Ehikutibo numero 67 nga gipirmahan ni Presidente Aquino niadtong Pebrero 21, 2012 nagtakda sa pagpabarog sa usa ka integrated mass transport network ilalom sa Public-Private Partnership nga mao ang estratehiya sa administrasyong Aquino para sa paglambo sa nasod.
Gihatagan ug punto ni Executive Secretary Paquito Ochoa Jr., ang kamahinungdanon sa usa ka organisadong mass transport system sama sa buses ug railways sulod sa iyang termino ni Presidente Aquino.
“Kining maong matang sa transport network system mao ang focal points sa administrasyong Aquino sa iyang infrastructure development program ilalom sa 2011-2016 Philippine Development Plan ug ilalom sa Public-Private Paretnership framework,” matod pa ni Ochoa.
Ang DOTC mao ang gitahasan isip primarcy policy, planning, programming, coordinating, implementing, regulating ug administrative entity sa pag-promote, pagpalambo ug pagregulate sa usa ka kasaligan ug coordinated network sa transportasyon alang sa mas dali, luwas ug episyente ug kasaligang serbisyo sa transportasyon.
Ilalom sa EO 67, ang proyekto nga tawgon ug Integrated Transport System maglakip sa pagpabarog ug duha ka integrated transport terminals nga dunay international standard sa amihanan ug habagatang bahin sa Manila. Ang lokasyon sa duha ka terminal gilantaw nga maghatag ug epektibong interconnection tali sa nagkalain-laing matang sa transportasyon ug serbisyo alang sa way-langan nga pagbiyahe sa mga sumasakay nga publiko.
Subay sa direktiba sa Presidente, dugang pang integrated terminals ang gikatakda usab nga tukuron alang sa susamang katuyoan.
Gipatin-aw ni Ochoa, nga sa kamanduan ni Presidente Aquino, ang proyekto ilakip sa 2011-2016 Public Investment Program sa National Economic Development Authority uh ipahaom sa pamaagi nga gisubay sa build-operate transfer law.
Ang direktiba usab sa Presidente nagmando usab sa pagmugna ug inter-agency committee, nga magsilbing advisory body nga magsiguro alang sa daling implementasyon sa proyekto.
Ang Kalihim sa DOTC ug Metro Manila Development Authority Chairperson maoy gitudlong mahimong Chairman ug Vice-Chairman sa inter-agency committee.
Ang uban pang membro sa komiti mao ang Kalihim sa Department of Public Works and Highways (DPWH) and Interior and Local Government (DILG); director general sa NEDA; chairman sa Land Transportation, Franchising and Regulatory Board (LTFRB); ug Assistant secretary sa Land Transportation Office (LTO).
Gawas sa paglantaw sa operasyon sa ITS, ang inter-agency committee mao usab ang gitahasan sa pagregulate sa terminal fees nga panginglon sa paggamit sa transport terminal ug uban pang pasilidad nga napabarog ilalom sa maong proyekto.
Ang pondo nga gamiton sa operasyon sa inter-agency committee pagakuhaon gikan sa regular nga pahat sa matag-membrong ahensiya.
Ang EO 67 mo-epekto gilayon human nga mapublikar kini sa usa ka pamantalaan nga dunay nasudnong sirkulasyon. (ATR/PCOO/PIA9-Zambo Norte)
Ang EO 67 mo-epekto gilayon human nga mapublikar kini sa usa ka pamantalaan nga dunay nasudnong sirkulasyon. (ATR/PCOO/PIA9-Zambo Norte)
