ni Alfonso T. Ruda
DIPOLOG CITY, MARCH 21(PIA)--- Gipahayag sa Malakanyang nga ang kadaugan sa Philippine Azkals football team nga naghimo ug kasaysayan pinaagi sa pagparot sa Palestine team sa usa ka kulba-hinam nga dula ug nagbutang kanila sa ikatulong puwesto sa bag-ohay pa lang natapos nga Asian Football Federation (AFC) Challenge Cup nga gipahigayon didto sa Nepal mao lamay usa sa mga manipestasyon nga ilang gihuptan ang mga hiyas nga nagdala kanila sa kalampusan.
Giluwatan ni Presidential Deputy Presidential spokesperson Abigail Valte ang pahayag niadtong Martes sa gabii, human gipildi sa Philippine Azkals ang Palestinian team aron makuha ang ikatulong puwesto sa maong kompetisyon.
Kini ang labing taas nga nakuha sa team sa Pilipinas niining maong matang sa paugnat sa kusog nga gisalmotan sa mga naglambong nasod.
“Ang atong mga kababayan mipuntos ug 4 ka goal batok sa Palestine goalkeeper padulong sa ilang pag-angkon sa ikatulong puwesto sa Asian Football Confederation Challenge Cup- ang labing taas nga puwestong nakuha sa PIlipinas sa maong kompetisyon. Ang atong team nakigharong sa labing maayong laking magdudula sa rehiyon, lakip na ang nahimong kampeyon nga mao ang DPR Korea,” matod pa ni Valte.
Matod pa ni Valte, ang administrasyong Aquino miduyog sa nasod nga Filipinhon pagpahalipay sa Philippine Azkal football team sa ilang kadaugan.
Gipahalipayan usab sa Malakanyang si Phil Youngbusband, kinsa nakapuntos ug labing daghang goals sa tibuok torneyo diin naangkon niya ang Golden Boot Award.
“Bisan pa man sa daghanang mga sagabal, nalampasan sa atong mga magdudula ug ilang coach ang atong gilaumang mahitabo. Kini naghatag kanato ug rason nga magpasigarbo ug magtudlo kanato sa pagtoo nga mahimo natong makab-opt ang kalibutanong kadaugan sa paugnat sa kusog, basta magkahiusa lamang ang mga magdudula,” matod pa ni Valte.
