ni Claro A. Lanipa
Pagadian City, Feb. 21 (PIA) – Si Marvic Leonen, ang hepe sa government peace panel mibutyag nga taliwala sa mga kalisdanan, ang negosasyon alang sa kalinaw uban sa Moro Islamic Liberation Front (MILF) ang miabante na sa unahan.
“Malaumon ko kaayo sa progreso sa maong sultihanay. Lisod kaayo ang negosasyon,” miingon si Leonen atol sa pagsugod sa ikaduhang adlaw sa 26th Formal Exploratory Talks tali sa Kagamhanan sa Pilipinas (GPH) ug ang MILF didto sa Malaysia ning bag-o lang..
Ang maong pamahayag gipagawas isip tubag sa mga kabalaka sa posibleng adunay mahitabong pagbara sa negosasyon tungod ang duha ka partido nagpadayon sa pagtuki sa mga sustantibong mga aspeto sa negosasyon.
“Among gituki na karon ang mga sustantibong isyu, nga mikubkub gayud sa kasingkasing sa maong negosasyon. Adunay mga mabug-at nga hinangyoan sa maong panagtakbo,” miingon si Leonen.
Sa iyang pagbukas nga pakigpulong, ang hepe negosyador mibutyag nga nagpadulong na kita ngadto sa daw maora’g baradong mga panghunahuna alang sa pagbalhin, lakip ang atong mga hunahuna kon unsaon sa paghimo sa permanenteng ug epektibong sulosyon alang sa atong katawhan.
Apan, gipatin-aw niya nga ang negosasyon motutok una sa tanan, kon unsa puede natong himoon alang sa atong katawhan, sa ilang komunidad ug alang sa ilang kaugmaon.
Nanawagan siya sa MILF aron molihok uban sa kagamhanan ug matinuuron pagtantiya sa mga hinungdan ug baroganan ug tan-awon ang ilang politikanhong panglantaw, hatagan ug importansya nga “adunay mas tukma nga mga tumong kaysa magpabiling sa atong karaang baroganan.” (OPAPP/PIA9/CAL)
