Robredo miawhag sa mga barangays nga mag-andam kanunay batok sa kalamidad

ni Claro A. Lanipa

Pagadian City, Feb. 13 (PIA) – Sa nahitabong 6.9 gikusgan nga linog ning milabay’ng semana sa Central Visayas ilabi na sa Negros Oriental, si Interior and Local Government Secretary Jesse Robredo nanawagan sa tanang punong barangays sa tibuok nasud sa paghimo’g disaster awareness and response campaign sa ilang tagsa-tagsa nga komunidad.

Gibutyag ni Robredo ang maong panawagan atol sa gipahigayong 2^nd general assembly ug National Executive Board meeting sa mga Liga ng mga Barangay, usa ka nasudnong kahugpungan sa 42,000 ka mga barangays, didto sa Manila ning bag-o lang.

Ang tigum gitambongan sa kapin sa usa ka gatos ka mga sumasalmot nga gilangkoban sa provincial ug highly urbanized cities’ chapter presidents ng mga Liga ng mga Barangay.

“Niining aspeto dako ang matabangan sa mga barangay tungod kay naa sila sa ubos ug sentro sa komunidad, ug labaw sa tanan nasayod sila kon diin nga dapit sa ilang barangay ang kanunay mabahaan ug modahili ang yuta,” iyang gipasabot.

Sa iyang pakigpulong, ang DILG secretary miawhag sa mga barangay chairmen nga sa kanunay mag-andam sa ilang disaster risk reduction and management plans lakip niini ang pagbakuwit sa mga residente kon gikinahanglan.

Gimandoan usab ni Robredo ang mga opisyales sa barangay sa pagsunod sa disaster protocols, pagbutang sa mga early warning systems, lakip ang pagpahigayon sa regular drills ug exercises aron sa pagpangandam sa  mga lumulupyo sa pagsagubang sa daotang epekto sa kalamidad.

Iyang gidani usab ang mga opisyales sa pag-organisar sa rescue teams, emergency group of responders ug community service brigades nga maoy motanyag sa hinanaling tabang sa mga mabiktima.

“Dako usab ug tabang kon aduna kamo’y gi-andam mga kagamitan ug mga kinahanglanon panahon sa emerhensiya,” miingon si Robredo.

Dugtong pa niya panahon sa kalamidad, mga opisyales sa barangay kinahanglan buksan ang ilang komunikasyon alang sa sayon nga koordinasyon sa mga otoridad lokal, volunteer groups ug ubang hingtungdan ahensiya sa kagamhanan, aron maseguro ang hinanaling panabang kon gikinahanglan.