Ni Alma L. Tingcang
PAGADIAN CITY, February 6 (PIA) - - Usa ka semana tapos ang malampusong paglusad nga gipangunahan ni Presidente Benigno Aquino III, ang online Philippine Business Registry (PBR) system sa Department of Trade and Industry (DTI) nakadawat ug positibong feedbacks, kini ang gitaho sa Malacanang kagahapong adlawa.
Si Deputy Presidential Spokesperson Abigail Valte miingon nga kadtong mga nakabenepisyo gikan niining bag-ong serbisyo nga gitanyag sa DTI mipaklaro sa kadali sa pamaagi pagrehistro sa ilang business name online ug ang pisikal nga presensiya dili na kinahanglan aron pagkumpleto sa maong proseso.
‘‘Nagpadayon na kini, adunay mga nakaparehistro na sa ilang business name online ug paspas kaayo ang proseso, ug nalipay kita kay importante kaayo kini nga dili na kinahanglan ang pisikal nga pag-adto sa DTI aron makaparehistro sa business name,” si Valte nagkanayon sa dzRB Radyo ng Bayan.
Pinaagi ning maong kalamboan, gidasig ni Valte kadtong adunay plano pagrehistro sa ilang gamay’ng negosyo nga mopahimulos niining programa nga gilusad aron paghapsay sa business registration sa nasod ingon man pagpapha sa red tape.
“Kadtong nagplano magsugod ug gamay nga negosyo, mas madali na karon ang proseso tungod sa online Philippine Business Registry system,” si Valte miingon.
Gilusad duha ka Biyernes na ang nakalabay, ang PBR system nagsilbi isip one-stop-shop alang sa mga negosyante nga gustong mo-transact o moparehistro sa ilang negosyo pinaagi sa paglambigit sa daghang ahensiya sa kagamhanan aron ang mga aplikante mahimong moparehistro bisan wala ang ilang presensiya.
Ang mga gidugtong nga ahensiya ubos sa PBR naglangkob sa DTI, Bureau of Internal Revenue, Home Development Mutual Fund, Philippine Health Insurance Corp., Social Security Sytem ug ang Securities and Exchange Commission. (ALT-PIA9/Zambo Sur)
