Ni Alma L. Tingcang
PAGADIAN CITY, February 1 (PIA) - -Ang kagamhanang Aquino maningkamot pag-ayo aron pagkab-ot ug 5%-6% gross domestic product (GDP) ning tuig 2012 base sa mando ni Presidente Benigno S. Aquino III.
“Buhaton namo ang tanang panglimbasog aron matagbo ang target. Ug ang presidente naghimo na ug daghang pamahayag kalabot niini ug mosunod na pagtuman ang mga hingtungdang ahensiya,” si Deputy Presidential Spokesperson Abigail Valte miingon.
Mao kini ang tubag ni Valte sa pangutana sa mga mamahayag kung konsiderahon ba sa kagamhanan ang 5%-6% GDP target malisod kab-oton alang sa kasamtangang administrasyon.
Gidepensahan usab ni Valte ang ekonomikanhong pagtubo sa nasod sa unang tuig sa administrasyong Aquino, nga samtang ang mga figures mas ubos kung ikumpara sa nakalabay nga pamunoan, mas daghang Pilipino usab ang nakabenepisyo gikan sa mga kalamposan sa pagpamuno ni Presidente Aquino.
“Mas maayo ang inclusive growth. Sama sa giingon sa presidente, samtang nakita ninyo ang mga numero nga gustong tan-awon sa ubang mga ekonomista, mas nindot kung ang kadaghanan kanato nakabati sa paglambo sama sa atong natagamtaman karon,” pahayag ni Valte.
Gisubli usab ni Valte ang pagduso sa usa ka mas agresibong paggasto sa pondo karong tuiga aron pagtuboy sa ekonomiya labaw na sa imprastruktura ug agrikultura.
Bisan pa adunay mga pagsaway sa dili maayong paggasto sa kagamhanan nga miapekto sa pagtubo sa ekonomiya sa nasod sa nakabay’ng tuig, ang pamunoan nag-ingon nga adunay mga external factors nga nakapahinay sa paglambo sa ekonomiya,
Lakip niini mao ang problemang pinansiyal sa Europa, ang slowdown sa ekonomiya sa Estados Unidos, ang mga kalamidad nga midangat sa Japan ingon man ang politikanhong kagubot sa Middle East. (ALT-PIA9/Zambo Sur)
