ni Franklin P. Gumapon
DIPOLOG CITY, Jan. 12 (PIA) - - Gikatakdang mohatag ang buhatan sa maayong panlawas ug libreng rotavirus vaccines sa may 5.2 milyones nga pobreng kabataan sa tibook nasud sugod karong bulan sa Abril.
Ang rotavirus vaccine mosanta sa rotavirus nga maoy hinungdan sa kalibanga sa mga puya ug gagmayng kabataan.
Matud pa ni Sekretaryo Enrique T. Ona, adunay 700,000 ka mga pobreng bata nga nagpangedaron unom ngadto sa 14 ka semana ang gipunting nga mahatagan sa nasampit nga bakuna sulod ning tuiga.
Dugang pa ni Ona, ang buhatan sa maayong panlawas migahin ug P700 milyones alang sa pagpalit sa bakuna alang sa mga bata gikan sa mga pobreng lugar sa nasud diin ang Conditional Cash Transfer (CCT) program sa Department of Social Welfare and Development (DSWD) kasamtangang gipatuman.
Gipasabot ni Ona nga kinahanglan atimanon ang kaayuhan sa panglawas sa kabataan tungod kay daghan ang nag-antus sa balatian nga pwede ra untang malikayan ug matambalan sama sa kalibanga nga mao usa’y ikaduhang hinungdan sa kamatayon sa mga kabataan ning nasud.
Ang rotavirus daling motakod kay pwede kining makuha sa mga hugaw nga kamot, dulaan, cribs, unlan, lampin ug uban pa.
Nagtoo usab ang mga scientist nga maong sakit pwedeng motakod pinaagi sa hangin tungod kay ang kagaw niini nakit-an sa mga luwa ug sip-on sa mga nagsakit nga mga bata.
Ang Pilipinas maoy unang nasud sa Asya nga gi-apil ang rotavirus vaccination sa iyang immunization program. (FPG/PIA-Zamboanga del Norte)
