Ni Alma L. Tingcang
| PAGADIAN CITY, January 18 - - Ang Prime Minister sa Thailand nga si Yingluck Shinawatra moabot sa Manila ugmang adlawa, Huwebes alang sa usa ka adlaw nga pagbisita nga gilaomang mopalig-on sa bilateral releations tali sa Pilipinas ug Thailand. Sumala pa sa Department of Foreign Affairs (DFA), dawaton ni Presidente Benigno S. Aquino III ang Prime Minister didto sa Malacanang ugma sa buntag aron pagbinayloay sa ilang mga panglantaw kabahin sa bilateral ug regional issues, lakip na ang pagpalig-on sa ekonomikanhong kasabotan sa duha ka nasod. Mao kini ang unang pagbisita ni Prime Minister Yingluck sa Pilipinas sukad siya milingkod sa puwesto niadtong Agosto 2011. Matod pa, ang duha ka opisyal maghisgot usab sa mga pamaagi aron mas pakusgan pa ang implementasyon sa kooperasyon kalabot sa enerhiya, agrikultura, depensa, kultura, edukasyon, pagbuntog sa drug trafficking, disaster risk reduction and management, ug daghan pa. Mag-inambitay usab sila sa ilang panglantaw sa mga mahinungdanong kalamboan sa Association of Southeast Asian Nations (ASEAN0, lakip na ang isyu kalabot sa West Philippine Sea (WPS). Si Presidente Aquino moabi-abi usab sa Thai Prime Minister pinaagi sa usa ka salo-salo sa paniudto sa ngalan sa nasangpit nga bisita. Ang pagduaw sa Thai Prime Minister maoy usa sa highlights sa ika-63rd anniversary sa pagkamugna sa diplomatic relations tali sa Pilipinas ug Thailand nga gisaulog karong tuiga. Ang Pilipinas ug Thailand lakip sa 5 ka nasod nga nag-establisar sa ASEAN niadtong Agosto 1967. (ALT-PIA9/Zambo Sur) |
