Ni Alma L. Tingcang
PAGADIAN CITY, January 25 - - Gawas sa ilang mandato isip maoy nag-unang tigpatuman sa balaod sa nasod, ang 140,000 kusog nga pwersa sa Philippine National Police (PNP) magtanom ug 10 milyon kahoy sa tibuok nasod isip kabahin sa ilang kontribusyon aron pagbatok sa global warming.
Si Director General Nicanor Bartolome, ang hepe sa PNP miingon nga ang pagpananom ug kahoy molungtad hangtod sa pito ka bulan.
Sa usa ka direktiba, si Bartolome miingon nga ang matag usa ka pulis magtanom ug dili momenos sa napulo (10) ka kahoy.
Matod pa ni Bartolome nga ang mapanganduyong proyekto naglaom nga molabaw sa 10 milyon nga marka tungod sa partisipasyon sa mga pamilya sa PNP personnel, PNP accredited nga non-government organizations (NGOs), lokal nga kagamhanan, ug mga citizen volunteers isip force multipliers.
“Usa kini ka hataas nga mando, pareho kataas sa mga kahoy nga motubo unya, apan masayon kini buhaton ug bililhon,” si Bartolome miingon.
Ang greening project agig suporta sa National Climate Change Action Plan (NCCAP) sa Climate Change Commission ilalom sa Office of the President.
Si Chief Supt. Agrimero A. Cruz Jr., PNP Spokesman miingon nga ang tanang regional offices sa kapolisan gimandoan na aron pag-ila sa mga reforestation areas sa kagamhanan ubos sa koordinasyon sa Department of Environment and Natural Resources (DENR) ug mga local government units (LGUs).
“Ang pagpananom ug kahoy maoy usa ka gamay lamang nga pamaagi sa PNP aron pagtabang pagpakunhod sa epekto sa climate change sa atong kalikopan. Hinuon, ang PNP dili lamang Maka-Diyos, Makabayan, ug Makatao apan kami usab Maka-kalikasan,” pamulong ni Cruz.
Ang katawhan mibati sa epekto sa global warming diin naapektohan usab ang ecological balance ug social change tungod sa pagtaas sa temperatura sa kalibotan ning milabay nga mga dekada.
Ang climate change naglangkob sa pagtaas sa sea levels sa tibuok kalibotan tungod sa pagtamas-tamas sa katawhan sa atong mga kalasangan, nga misangpot usab sa grabeng pagbaha sama sa nahitabo sa bagyong “Sendong” ug “Ondoy” nga na-eksperensiya sa atong nasod ning nakalabay’ng duha ka tuig ug mikalas sa liboan ka kinabuhi. (ALT-PIA9/Zambo Sur)
