Ni Alma L. Tingcang
PAGADIAN CITY, January 20 - - Ang Department of Health (DOH) mitaho nga ang Pilipinas usa sa mga nasod nga gastohan sa Global Fund, usa sa kinadak-ang financier sa kalibotan diha sa mga programa sa anti-AIDS, tuberculosis ug malaria.
Si Assistant Secretary Eric Tayag, spokesperson sa DOH miingon nga gisusi nila pag-ayo ang mga hangyo sa kagamhanan kalabot sa mga programa nga puwedeng gastohan sa Global Fund.
Gihatagan usab niya ug kamahinungdanon ang panginahanglan sa pondo alang sa HIV/AIDS prevention aron matabangan ang mga adunay sakit nga sama niini.
“Ang Global Fund adunay mga rekisitos apan ang importante mao nga maapil kita sa mga nasod nga makadawat ug pondo gikan kanila,” si Tayag miingon.
Nagsugod sa ilang operasyon niadtong tuig 2002, ang Global Fund miluwas sa 7.7 milyon nga kinabuhi pinaagi sa paghatag ug AIDS treatment alang sa 3.3 milyon katawhan, anti-tuberculosis nga tambal alang sa 8.6 milyon ug 230 milyon nga mosquito nets nga adunay insecticide aron masumpo ang malaria.
Ang Global Fund kasamtangang gipondohan sa mga kontribusyon gikan sa mga kagamhanan sa mga adunahang nasod, lakip na ang nagtukod sa Microsoft nga si Bill Gates nga naghatag ug seed money alang sa maong proyekto. (ALT-PIA9/Zambo Sur)
