ni Franklin P. Gumapon
DIPOLOG CITY, Jan. 6 (PIA) - - Gipaluyuhan sa Philippine Drug Enforcement Agency (PDEA) ang usa ka balaud-non nga gipadas-ug ni Senadora Miriam-Defensor-Santiago nga nagtinguha sa pag-santa sa mga bisyo sa bino, sigarilyo ug druga sa mga tinun-an sa tibook nasud.
Gibutyag pa ni PDEA Director General Jose S. Gutierrez Jr., ang iyang buhatan misuporta sa Senate Bill 3085 nga giuluhan ug “Stay Clean and Sober Act” aron mapakgang ang problema sa bino, sigarilyo ug druga sa mga tinun-an.
Ang maong balaud-non nagmando sa Department of Education (DepED) inabagan sa Commission on Higher Education (CHED) ug PDEA nga mohimo ug mga programa aron mapakgang ang mga dautang bisyo sa kabataan lakip na ang pagpadas-ug sa mga lakang nga mapanalipdan sila batok sa nasampit nga mga bisyo. Kadtong anaa na sa maong bisyo, tabangan usab sila nga maka-undang niini.
Gipasabot ni Gutierrez nga ang maong balaud-non misuporta usab sa Akta Republika 9166 kon Comprehensive Dangerous Drugs Act of 2002 nga nagtinguha nga i-apil sa pagtudlo sa gikan sa elementarya, sekondarya ug sa kolehiyo sa tanang tunghaan sa nasud ang kabahin sa paglikay sa mga bisyo ilabina sa druga.
Si Gutierrez nagkanayon nga ang nasampit nga balaudnon nag-ila sa dakung papel nga gihuptan sa mga tunghaan sa pag-sumpo sa ginadiling druga. (FPG/PIA-|Zamboanga del Norte)
