Ni Alma L. Tingcang
PAGADIAN CITY , Jan 10 (PIA) – Sa makausa pa, gipakita sa Administrasyong Aquino ang kamatinud-anon niini sa paghatag sa nag-una ug de-kalidad nga pag-atiman sa maayong panglawas sa mga Pilipino pinaagi sa paglusad sa nag-inusarang cancer treatment center sa Mindanao didto sa Tagum City, Davao del Norte aron pagsuporta sa mga paningkamot ni Presidente Benigno Aquino III nga isulong ang mga serbisyong medical sa kagamhanan sa tibuok nasod.
Sa iyang mensahe nga gibasa ni Health Secretary Enrique T. Ona atol sa pormal nga inagurasyon sa Nuclear and Radiotherapy Center didto sa Mindanao Cancer Center, Davao Regional Hospital kagahapong adlawa, siya miingon nga ang bag-ong pasilidad nagsilbing timaan sa mahayag nga paglaum sa mga pasyenteng adunay cancer labi na ang mga kabos nga makadawat ug mas maayong atensiyong medical.
Ang presidente miingon nga base sa record nga nakuha sa Department of Health (DOH), ang cancer maoy usa sa mga gikahadlokang sakit nga mikalas sa kinabuhi sa daghang mga Pilipino.
“Ang pagbukas sa Mindanao Cancer Center mao usab ang paghatag ug paglaum sa mga Pilipinong biktima sa kanser. Sumala pa sa record sa DOH, mao kini usa sa nag-unang hinungdan sa kamatayon dinhi sa nasod,’’ ang presidente miingon.
Ang research nga gihimo sa DOH nagpakita usab nga adunay 200,000 ka Pilipino nga nag-antos sa cancer matag tuig, ug matubag kini pinaagi sa mga bag-o ug modernong equipo ug pasilidad sa nasangpit nga cancer center.
“Kining maong statistics ang gusto natong mahatagan ug solusyon pinaagi ning pasilidad nga atong gi-inagurahan karon. Mapalapdan niini ang serbisyong medical dili lamang alang niadtong taga Davao, apan alang sa tibuok Mindanao,” ang presidente namahayag.
“Gilaoman nga adunay 30 ka pasyente matag adlaw ang makadawat ug igo, barato ug de-kalidad nga atensiyon ug tabang-medikal gikan sa maong tambalanan. Pinaagi sa mga bag-ong serbisyo ug gamit dinhi sama sa Radiation therapy ug Digital Linear Accelerator, mapugngan ang paggrabe o dili ba kaha matambalan ang nagkalain-laing matang sa cancer,” dugang pahayag sa presidente.
Matod pa niya, pinaagi sa pagpursigi, panag-hiusa ug kooperasyon tali sa kagamhanan ug sa katawhan, wala gayuy hagit nga dili nato iresolba. (ALT-PIA9/Zambo Sur)
