by Gideon C. Corgue
Si Executive Secretary Paquito N. Ochoa Jr. ning Miyerkoles nagpasalamat sa Philippine National Police (PNP) sa ilang paningkamot pagpakunhod sa crime rate sa nasud sa nakalabay nga tuig samtang nag-awhag sa mga opisyal sa kapulisan nga mohimo sa mga epektibo nga lakang pagpalambo sa kahusay ug kalinaw.
“Bisan ug ang pagkunhod sa mga krimen ang gi-abiba, dili kini sarang hinungdan nga maglipay. Ang kapulisan gikinahanglan nga magpadayon sa pagpaningkamot nga mokunhod ang krimen ingon man paghatag kaseguruhan ug kaluwasan sa mga katawhan ug pagmentenar sa kahusay ug kalinaw sa nasud,” si Ochoa nagkanayon sa pamahayag.
Si Ochoa mihatag reaksyon sa taho nga gipagula sa PNP nga nagpakita nga ang mga krimen sa palibot sa nasud mikunhod sa 23.36 porsyento sa 2011 gikan sa nakalabay nga tuig. Usa ka opisyal nga data gikan sa PNP nagpadayag nga ang mga krimen nga nahimo sa nakalabay nga tuig mikunhod sa 248,378 gikan sa 2010 nga figures sa 324,083.
Ang PNP nakaalinggat sa mga figures sa nakalabay nga tuig ang girepresentahan sa katunga sa 502,665 nga kinatibuk-ang gidaghanon sa mga krimen nga natala sa 2009.
Si Ochoa, kinsa mao ang chairman sa Cabinet Cluster on Security, Justice, and Peace ug sa Presidential Anti-Organized Crime Commission (PAOCC), midayeg sa PNP paghimo ug mga lakang nga makunhuran ang krimen, apan nag-awhag sa 140,000 malig-on nga pwersa sa kapulisan aron pagpadayon sa malahutayon nga crime prevention ug reduction nga mga stratehiya.
Dugtong pa ni Ochoa nga ang mga tigpatuman sa balaod gikinahanglan nga madasig sa ehemplo nga gipakita ni Presidente Benigno S. Aquino III, kinsa nagpadayag nga ilawom sa kasamtangan nga pangagamhanan, “walay usa nga molabaw sa balaod ug kung si bisan kinsa man nga makalapas ang manubag sa krimen nga ilang nahimo.”
Sayo pa niini, ang PNP spokesperson nga si Chief Superintendent Agrimero Cruz Jr. nagkanayon nga ang pagkunhod sa crime rate nagumikan sa higpit nga pagpatuman sa kapulisan sa integrated patrol system sa tibuok nasud.
