Ni Alma L. Tingcang
PAGADIAN CITY, January 27 - - Aron pagtagbo sa mga kinahanglanon sa manufacturing industry, diin nakita nga mobawi karong tuiga, si Presidente Benigno Aquino III miingon nga ang kagamhanan naghimo ug daghang mga lakang aron pagkunhod sa bayronon sa kuryente.
Sa usa ka forum nga gipahigayon atol sa Arangkada Pilipinas kagahapong adlawa didto sa Mariott Hotel sa Pasay City, ang presidente miingon nga ang pagpakunhod sa bayronon sa elektrisidad dinhi sa Pilipinas makadani ug mas daghang investors o mamuhunan nga magtukod ug negosyo sa atong nasod.
“…sa inyong nahibaw-an, ang manufacturing industry nag-antos tungod sa kataas sa balayronon sa kuryente busa naghimo kita ug mga pamaagi aron maubsan kini. Una, pinaagi sa pag instalar ug based-generating nga mga planta. Apan mas importante mao ang pagpadali sa open access electricity market aron mahimo na kining functional,” ang presidente miingon.
Ang open access electricity market nagtugot sa mga dagkong konsumante sa elektrisidad sa Luzon ug Visayas nga magpili sa ilang kaugalingon nga power suppliers. Sa ngadto-ngadto, ang mga households aduna na usab kapasidad nga magpili. Kining maong set-up dili sama sa kasamtangang sistema diin ang mga konsumante limitado lamang ngadto sa mga suppliers nga nagserbisyo sa ilang mga dapit.
“Karon, mao kini ang gikinahanglang buhaton aron pag-awhag sa mga manufacturing business nga mobalik dinhi,” matod pa sa presidente. (ALT-PIA9/Zambo Sur)
