ni Alfonso T. Ruda
DIPOLOG CITY, JAN. 31(PIA)---Ang Department of Public Works naggahin ug P10-bilyones kon 11 porsiento sa ilang kinatibuk-ang pahat sa 2012 nga P99.4 bilyones para sa mga proyekto sa flood control.
Si DPWH Secretary Rogelio Singson, miingon nga ang maong kantidad gamiton sa pagpabarog ug mga flood control projects. Lakip sa mga proyekto nga hatagan ug prayoridad mao ang water catchments ug water impounding structures sa ibabaw nga bahin sa mga kasubaan, ingon man pag-ayo sa nangadaot nga flood control structures.
Lakip sa mga flood control projects nga hatagan ug prayoridad nga mapatuman karong tuiga mao ang Pampanga Delta ug Pampanga River Projects; Laoag River Basin ug Sabo Project; Bicol River Basin ug Watershed Project; Mindanao River Basins; Mandaluyong City drainage improvement project; Cagayan de Oro River Basin; Pasig-Marikina River Channel Improvement Project, Phase II; Mt. Pinatubo Hazard Urgent Mitigation Project, Phase III; San Roque Multi-Purpose, Flood Control Control Component; ug drainage protection works sa mga nasudnong kadalanan ug tulay sa tibuok nasod.
“Para karong tuiga, padayon nga hatagan ug prayoridad ang flood control works sa mga nanag-una ug dagkong kasubaan base sa nakompletong master plan,” matod pa ni Singson.
“Padayon usab natong i-promote ang innovative technologies sama sa geotextiles ug coco-netting para slope protection ug soil erosion control; pagpromote sa rainwater harvesting and retarding basins; ug suporta sa non-structural measures sa ubang mga ahensiya sa gobyerno sama sa hazard mapping sa Department of Environment and Natural Resources(DENR); flood monitoring ug forecasting sa DOST/PAGASA ug ang pagpabalhin sa mga eskwaters nga nagpuyo sa daplin sa kasubaan ugn uban pang lugar nga agianan sa tubig,” dugang pa ni Singson.
Hugtanon usab ang gihimong koordinasyon sa DPWH sa ilang water convergence ugh pagdumala sa river systems uban sa Department of Agriculture (DA); Department of Agrarian Reform (DAR) ug DENR may kalabutan sa mga problema kabahin sa pagdumala sa river system.(ATR/PIA9-Zambo Norte)
