ni Claro A. Lanipa
Pagadian City, 28 Jan. (PIA) – Ang Department of Labor and Employment (DOLE) ning bag-o lang mipahibalo nga ang ilang buhatan gipagawas ug P6.912 milyon nga pondo alang sa emergency employment ug livelihood assistance alang sa mga mamumuo kinsa nawad-an ug panginabuhian ug naapektohan sa nahitabong makalilisang pagbaha dala sa bagiong Sendong didto sa mga dakbayan sa Cagayan de Oro ug Iligan.
Matod pa ni Labor and Employment Secretary Rosalinda Dimapilis-Baldoz, ang P6.912 milyon gibahin sa mosunod P3.839 milyon alang sa Emergency Employment Program (EEP) ug and P3.073 alang sa livelihood assistance pinaagi sa paghatag ug hinagiban ug kagamitan isip starter kits.
Ang EEP ug livelihood programs mao ang hinanaling pagpataliwala sa maong departamento. Kining duha ka mga program gitumong sa pagtabang sa mga mamumuo sa pagbawi ug pagbangon panahon sa emerhensiya ubang mga natural nga kalamidad.
“Pinaagi niining programa sa DOLE, gusto nato lig-onon ang moral sa atong mga mamumuo ug tabangan nato sila sa pagpadayon sa unahan,” miingon si Baldoz.
Dugtong pa sa hepe sa buhat, sa maong pondo kon P3.225 milyon niini gigahin alang sa suhol sa mga mamumuo nga nawad-an ug trabaho. Kini sila pagabayran sa minimum wage rate sa P215 matag adlaw alang sa walo ka oras pagtrabaho. Sila moapil sa mga buluhaton sa pag-ayo sa komunidad nga apektadong dapit sama sa pagpanglimpyo sa mga agianan sa tubig kon kanal, pagpanglimpyo sa komunidad, tulunghaan ug evacuation centers sulod sa 15 ka mga adlaw. Gawas sa mga suhol, ang maong kantidad gamiton usab sa pagpalit ug mga kagamitan ug ubang mga kinahanglanon.
Ang EEP gilaoman makahatag ug benepisyo sa 1,000 ka mga mamumuo. Ang mga kuwalipikadong benepisyaryo mogikan sa mga barangays Macasandig, Carmen, Balulang, Consolacion ug Iponan sakop sa Cagayan de Oro ug Hinaplonan, Santiago, Mahayhay, Sta Filomena, ug Tubod sa dakbayan sa Iligan.
