Ni Alma L. Tingcang
| PAGADIAN CITY, January 19 - - Si Vice President Jejomar Binay naglaum nga ang bag-ong giaprubahan nga kalagdaan kalabot sa paglarga sa mga pasahero padulong sa gawas sa nasod pinaagi sa Inter-Agency Council Against Trafficking (IACAT) mopalambo sa kampanya sa gobyerno batok sa human trafficking. Si Binay, kinsa naglingkod isip chairman emeritus sa IACAT miila usab sa kontribusyon sa “offloading” policy diha sa pagkunhod sa mga kaso sa human trafficking dinhi sa nasod. “Ang offloading policy dako ug gikatabang sa atong ginansiya sa kampanya batok human trafficking, ug tungod niini, misaka kita ngadto sa Tier 2 diha sa US State Department index. Karong tuiga, naglaom kita nga mosaka ngadto sa Tier 1,” si Binay nagkanayon. Miingon ang bise presidente nga gimandoan sa IACAT ang Technical Working Group nga mopagawas ug mga lagda aron mapaneguro ang transparency ug consistency sa implementasyon sa offloading policy, ug wagtangon kung adunay personal discretion. Hinuon, siya miingon nga ang IACAT magpadayon nga magbantay ug maminaw sa mga sentimento sa mga biyahero, labi na ang mga OFWs. “Nagtuo kami nga ang bag-ong tamdanan mas masangkaron tungod kay gipalapdan ang membership sa IACAT, lakip na karon ang non-government organizations, iponon namo tanan ang ilang inputs,’’ si Binay miingon. Dugang pa nga ang kagamhanan kanunay magrespeto sa katungod nga mobiyahe, ug ang bag-ong lagda mobalanse sa maong katungod ingon man sa gipalapdang kampanya batok sa trafficking. ‘‘Kung aduna pa gihapoy reklamo gumikan nga wala maapil sa mga lagda, aksiyonan namo kini ug palamboon pa,’’ matod ni Binay. Ang bag-ong lagda naglatid sa mga rekisitos aron pag- assess sa mga international-bound nga pasahero base sa 4 ka kategorya: turista; overseas Filipino workers; immigrant ug permanenteng residente; ug espesyal nga klase sa pasahero. |
