Ni Alma L. Tingcang
PAGADIAN CITY, January 24 - - Si Presidente Benigno Aquino III mideklarar sa Enero matag tuig isip “Philippine Tropical Fabrics Month.”
Sulod sa Proclamation No. 313 nga gipirmahan ni Executive Secretary Paquito Ochoa niadtong Enero 12, 2012, gi-isyu ni Presidente Aquino ang maong deklarasyon aron pagtuboy sa pag-ila sa mga katawhan paggamit sa mga indigenous nga panapton o tela sa nasod.
Ubos sa Republic Act 9242 nga gitawag “Philippine Tropical Fabrics Law of 2004, ang tropical fabrics mao kadtong nagbaton sa natural nga fibers nga gilala ug gigama dinhi sa Pilipinas. Mao kini ang kasagaran gigamit alang sa mga uniporme sa mga opisyales ug empleyado sa kagamhanan.
“Ang implementasyon sa RA 9242 mopalambo sa kahibalo paggamit sa natural fibers sama niining gigama gikan sa pinya, saging, abaka ug silk nga mga tela ug susamang produkto aron pagbuhi pag-usab ug pag-upgrade sa lokal nga industriya sa textile ug garments ingon man aron pagmugna ug livelihood opportunities sa agricultural ug industrial sectors,” ang presidente miingon.
Ang hepe ehekutibo miila nga ang Proclamation No. 86 (s. 2010) mideklarar sa Enero 24, 2011 isip “Philippine Tropical Fabrics day” ubos sa pag-awhag sa Philippine Textile Research Institute (PTRI) sa Department of Science and Technology (DOST) nga mipadugang sa interest kalabot sa tropical fabrics gikan sa mga local nga industriya.
Sa dihang gi-isyu ang Proclamation 313, gipasabot sa presidente ang naani gikan sa selebrasyon sa unang Philippine Tropical Fabrics day aron awhagon ang aktibong partisipasyon sa mga institusyon sa kagamhanan ug local nha industriya kalabot sa paggamit sa Philippine Tropical Fabrics ingon man ang mga local nga natural fibers.
Gimandoan ni Presidente Aquino ang PTRI-DOST aron paghatag sa pondo alang sa gastohan sa selebrasyon.
Ingon man nagmando usab siya sa PTRI-DOST nga segurohon ang extensive research alang sa paggamit sa natural fibers.
“Ang tanang fabric producers, textile manufacturers, garments ug geotextile industries ingon man ang pribadong sektor, asosasyon, institusyon ug ang academe giawhag ang ilang aktibong partisipasyon sa pagsaulog sa “Philippine Tropical Fabrics Month” ug makigtambayayong sa kagamhanan aron paghimo sa Philippine textile industry isip nag-unang lider sa global textile market,” si Presidente Aquino nagkanayon. (ALT-PIA9/Zambo Sur)
