Ni Alma L. Tingcang
| PAGADIAN CITY, January 18 - - Si Presidente Benigno Aquino III magpadayon pagtutok sa pagtubo sa ekonomiya sa nasod, ug dili siya magpatugaw sa kasamtangan nga impeachment trial ni Supreme Court Chief Justice Renato Corona, ang spokesman ni Presidente Aquino miingon. “Sa iyang pakigpulong atol sa inagurasyon sa D’Luxe Bags Philippines, usa ka bag-ong luxury bag factory sa Tarlac, ang presidente miingon nga samtang ang iyang administrasyon naghupot sa iyang panaad alang sa maayong pangagamhanan, dili usab kini magakaluya diha sa padayon nga pagpalambo sa ekonomiya, ug gitumbok ang mga nahimo sa administrasyon sama sa dugang 2.1 milyon nga trabaho sa 2011, ingon man ang dugang 1 milyon miabot nga turista sa miaging tuig,” si Presidential Spokesman Edwin Lacierda miingon sa usa ka niluwatang pahayag ngadto sa media kagahapon. Ang mga dagkong lakang nga gihimo aron pagbuntog sa korupsiyon, kakabos ug ang pagduso sa maayong pangagamhanan – ang mga kalamposan nga nakab-ot sulod sa usa ug tunga sa tuig – kini mao lamang ang indikasyon sa mga kausaban nga padayong ipatuman sa umaabot nga mga tuig,” dugang pahayag ni Lacierda. |
Sa pakigtagbo sa presidente dili pa lang dugay kauban ang mga miyembro sa US Congress, si Lacierda miingon nga ang mga Amerkanong magbabalaod nagpahayag sa ilang kumpiyansa sa reform agenda sa administrasyong Aquino.
Atol sa usa ka press conference sa Malacanang kagahapon, si Lacierda miingon nga giluwatan niya ang usa ka pamahayag aron paghatag kamahinungdanon sa programa kalabot sa ekonomiya ug aron pagsupak sa alegasyon nga nawala na ang pagtutok sa presidente diha sa ekomiya.
Niadtong nakalabay nga semana, ang Cable News Network (CNN), nagtumbok sa dili pa lang dugay nga assessment sa Hongkong and Shanghai Banking Corp. (HSBC) nga nagtaho nga sa tuig 2050, ang Pilipinas moambak sa hataas kaayo nga lugar ug mahimo na kining ika-16 nga nasod nga pinakadako ug ekonomiya sa tibuok kalibotan.
Ang HSBC miluwat sa usa ka taho nga nagtag-an sa pagsaka ug paghagba sa mga ekonomiya sa kalibotan ning mosunod nga 40 ka tuig. (ALT-PIA9/Zambo Sur)
