MANILA , Oct. 7 (PIA) –- Mipasalig ang Malacanang kagahapong adlawa ug mas hingpit nga seguridad sa mga minahan human nahitabo ang pag-atake sa mga New People’s Army didto sa Surigao del Norte niadtong Lunes.
Ang mga Japanese ug Australian mining investors mipaabot sa ilang kabalaka kalabot sa seguridad sa mining operations dinhi sa Pilipinas bisan pa sa pasalig sa kagamhanan nga ipatuman ang mas higpit nga lakang alang sa seguridad.
“Nasabtan namo ang ilang kabalaka tungod kay bisan kami nagmahay sa maong hitabo, busa naghimo na kami ug mga lakang aron masulbad kini.
Nagpahigayon kita ug threat assessment ug buhaton kini ubos sa rekomendasyon sa Department of National Defense (DND), Armed Forces of the Philippines (AFP) ug Philippine National Police (PNP),” si Presidential spokesman Edwin Lacierda miingon atol sa usa ka media briefing sa Malacanang kagahapong adlawa.
Sa dihang gipangutana siya kabahin sa mga hinanaling aksiyon nga gihimo sa kagamhanan, si Lacierda miingon nga ang mga polis ug military ang naghimo niini ug ang mga security officials wala pa magpahibalo sa Palasyo kalabot sa ilang gihimong mga security adjustments.
Mipasalig usab si Lacierda nga imbestigahan ang alegasyon nga pag-abuso sa mga mining firms nga maoy nakapaaghat sa pag-atake didto sa Surigao del Sur.
Una nang gikataho nga ang mga indigenous peoples (IPs) misimpatiya sa gihimo sa mga NPA ug bisan si environment adviser Neric Acosta na-shock sa mga tataw nga kalapasan niini.
Hinuon, si Lacierda miingon nga ang NPA dili unta dayon mohimo sa maong pag-atake aron pagresolba sa maong isyu ug nga adunay daghang pro-environment nga miembro sa gabinete ni Presidente Aquino nga makatubag unta sa maong isyu.
“Dili kinahanglan nga mahitabo ang mapintas nga pag-atake aron pagresolba sa maong suliran. Puwede kini ireklamo ngadto sa kagamhanan, kang DENR Secretary Ramon Paje, kang Secretary Neric Acosta nga giila isip mga environmentalists,” si Lacierda nagkanayon.
“Ang maong problema gipaabot unta sa mga hingtungdan kung adunay mga kalapasan o pag-abuso, ug kung nakita kini ni Acosta, segurado ako nga susihon niya kini ug aksiyonan sa labing madali,” pamulong ni Lacierda.
Ang grupo sa NPA mihimo ug pag-atake didto sa Taganito Mining Corp. (TMC), Taganito HPAL Nickel Corp. ug Platinum Group Metals Corp. (PGMC) didto sa Claver, Surigao del Norte niadtong Lunes ug mikalas sa kinabuhi sa tulo ka security guards.
Gisunog usab sa mga armadong rebelde ang napulo (10) ka dump trucks, walo (8) ka backhoe, duha ka barge ug guest house ingon man gikuha usab niini ang daghan armas gikan sa pribadong mga security guards. (ALT-PIA9/Zambo Sur)
